އެމެރިކާއާ އެކު ސައުދީ އަރަބިއްޔާގައި ފެށުމަށް ހަމަޖެހިފައިވާ މަޝްވަރާތަކުގައި، ރަޝިޔާ އާ އެކު ސުލްޙައިގެ އެއްބަސްވުމެއް ޔޫކްރޭނުން ހުށަހަޅާނެކަމަށް ބައެއް ރިޕޯޓުތައް ބުނެފިއެވެ.

ސައުދީގައި މަޝްވަރާތައް ފަށަން ތައްޔާރުވެފައިވަނީ، އެމެރިކާގެ ރައީސް ޑޮނަލްޑް ޓްރަމްޕް އާއި ޔޫކްރޭކުނުގެ ރައީސް ވޮލޮޑިމިޔަރ ޒެލެންސްކީ، ވައިޓް ހައުސްގައި ބޭއްވި ބައްދަލުވުން ދެ ރައީސުންގެ މެދުގައި ބޮޑު އަރައިރުމަކަށް ބަދަލުވެ، ދެ ރައީސުންގެ މެދުގައި ބަހުގެ ހޫނު ޙަމަލާތަކެއް ބަދަލުކޮށްފައިވާ ދަނޑިވަޅެއްގައެވެ.

ވައިޓް ހައުސްގެ އޯވަލް އޮފީހުގެ ބައްދަލުވުން ހޫނުވީ، ރަޝިޔާގެ ރައީސް ވްލެޑެމިޔަރ ޕޫޓިންއާ އެކު މަޝްވަރާ އިސްކޮށް، ސުލްޙަވެރި ޙައްލެއް ގެންނަން ޒެލެންސްކީއަށް ބާރު އަޅަން ފެށުމުންނެވެ.

އޭގެފަހުން، ޓްރަމްޕް ވަނީ އެމެރިކާއިން ޔޫކްރޭނަށް ފޯރުކޮށްދެމުންދާ އަސްކަރީ އެހީ މި ވަގުތަށް މަޑުޖައްސައިލަން ނިންމަވައިފައެވެ.

ސައުދީގެ ވެރިންނާ ބައްދަލުކުރައްވަން ޒެލެންސްކީ މި ވަގުތު ޖިއްދާގައި ހުންނެވިޔަސް، އެމެރިކާގެ ޚާރިޖީ ވަޒީރު މައިކް ރޫބިޔޯ އާއި ޓްރަމްޕްގެ ޤައުމީ ސަލާމަތާބެހޭ އެޑްވައިޒަރު މައިކް ވޯލްޓްޒް އާ އެކު ކުރުމަށް ހަމަޖެހިފައިވާ މަޝްވަރާތަކުގައި އޭނާ ބައިވެރިވެވަޑައެއް ނުގަންނަވާނެއެވެ.

ބައްދަލުވުމުގެ ކުރިން ރޫބިޔޯ މީޑިޔާތަކަށް ވިދާޅުވީ، މި މަޝްވަރާތަކުގެ ތެރެއިން ޔޫކްރޭނަށް ފޯރުކޮށްދޭ އަސްކަރީ އެހީ މަޑުޖައްސާލާފައި އޮތުން ނިމުމަކަށް ގެނެވޭނެ ކަމަށް އުއްމީދުކުރައްވާ ކަމަށެވެ.

ޓްރަމްޕް އާއި ޒެލެންސްކީގެ ބައްދަލުވުމަށްފަހު، ދެ ޤައުމުގެ މެދުގައި ޔޫކްރޭނުގެ އަގުބޮޑު މަޢުދަނުތަކުން ނަފާ ހޯދުމުގެ އެއްބަސްވުމެއްގައި ސޮއިކުރަން ހަމަޖެހިފައިއޮތަސް، ދެ ރައީސުންގެ އަރައިރުމަށްފަހު އެކަން ވެސް ކުރިއަށް ގޮސްފައެއް ނުވެއެވެ.

އެ އެއްބަސްވުމުގައި ސޮއިކުރަން ޔޫކްރޭނު އަދިވެސް ތައްޔާރުކަމަށް ޒެލެންސްކީ ފަހުން ވިދާޅުވެފައިވެއެވެ.

ނަމަވެސް، އެ އެއްބަސްވުމާގުޅޭ މަޝްވަރާއެއް އެޖެންޑާގައި ހިމެނިފައިނުވާ ކަމަށް ރޫބިޔޯ ވިދާޅުވިއެވެ.