ފިލިޕީންސްގައި މަސްތުވާތަކެއްޗާ ދެކޮޅަށް ސަލާމަތީ ބާރުތަކުން އޭރު ކުރިއަށް ގެންދިޔަ އޮޕަރޭޝަންތަކުގައި ހިންގި ލާއިންސާނީ ބޮޑެތި ޖަރީމާތަކާ ގުޅިގެން، އޭރު ރައީސް ކަމުގައި ހުންނެވި ރޮޑްރީގޯ ޑުޓަރޓޭ ފުލުހުން ހައްޔަރުކޮށްފިއެވެ.

ފިލިޕީންސްގެ ފުލުހުން ޑުޓަރޓޭ ހައްޔަރުކޮށްފައިވަނީ، އޭރު ހިންގި ލާއިންސާނީ ޖަރީމާތަކާ ގުޅިގެން އިންޓަނޭޝަނަލް ކްރިމިނަލް ކޯޓު (އައިސީސީ) އިން ނެރެފައިވާ ހައްޔަރުކުރުމުގެ އަމުރު ތަންފީޒު ކުރުމަށެވެ.

އުމުރުފުޅުން 79 އަހަރުގެ ޑުޓަރޓޭއަށް އައިސީސީން ކުރަނީ ލާއިންސާނީ ޖަރީމާ ހިންގުމާއި މީހުން މެރުމުގެ ދަޢުވާއެވެ.

ޑުޓަރޓޭ އިސްކޮށް ހުންނަވައި މަސްތުވާތަކެއްޗާ ދެކޮޅަށް އެ ޤައުމުގެ ސަލާމަތީ ބާރުތަކުން ހިންގި އޮޕަރޭޝަންތަކުގައި އެތައް ހާސް މީހުން ވަނީ މަރުވެފައެވެ. އޭގެތެރޭގައި މަސްތުވާތަކެއްޗާ އެއްވެސް ގުޅުމެއް ނެތް މީހުން ހިމެނޭކަމުގެ ތުހުމަތުތައް ވަނީ އަމާޒުވެފައެވެ.

ޑުޓަރޓޭ ހައްޔަރުކޮށްފައިވަނީ ޤާނޫނާ ޚިލާފަށް ކަމަށް އޭނާގެ ވަކީލު ވަނީ ވިދާޅުވެފައެވެ.