ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފުގެ ލަނޑާއެެކު އެފްއޭއެމް ވެޓެރަންސް ލީގުގައި މިއަދު ހަވީރު ކުޅުނު މެޗުގައި ސްޓެލްކޯ އަތުން 5-0 ގެ ތަފާތު ބޮޑު ނަތީޖާއަކުން މުއިވެޔޮ ފްރެންޑްސް މޮޅުވެއްޖެއެވެ.

މިއީ މި ފަހަރުގެ މުބާރާތުގައި މި ދެ ޓީމު ވެސް ކުޅުނު ދެވަނަ މެޗެވެ. ފުރަތަމަ މެޗުގައި ކުލަބު އީގަލްސް އަތުން ސްޓެލްކޯ މޮޅުވިއިރު، ދަ ގްރާންޑޭއާ މުއިވެޔޮ ފްރެންޑްސް ވަނީ އެއްވަރުވެފައެވެ.

މާފަންނު ޓާފް ދަނޑުގައި މިއަދު ހަވީރު ކުޅުނު މެޗުގައި ނައިބު ރައީސް ޙުސައިން މުޙައްމަދު ލަޠީފު ވަނީ މުއިވެޔޮ އަށް ލަނޑެއް ޖަހައިދީފައެވެ. މިއީ ޕެނަލްޓީ އޭރިޔާތެރެއިން ފޮނުވާލި ބޯޅައެއް ގޯލްގެ ތިރީކަނަށް އަމާޒުކޮށްލައިގެން ނައިބު ރައީސް ކާމިޔާބުކުރި ގޯލެކެވެ.

މުއިވެޔޮގެ އަނެއް ހަތަރު ލަނޑުގެ ތެރެއިން އިބްރާހިމް ފުރުގާން ވަނީ ދެ ލަނޑުޖަހައިފައެވެ. އެ ޓީމުގެ އަނެއް ލަނޑުތައް ޖެހީ އަހުމަދު ސައީދު (އައްމަޓީ)، އަބްދުﷲ ސުޖާއު އެވެ. މި މެޗުގެ މޮޅު ކުޅުންތެރިއަކަށް ހޮވުނީ މުއިވެޔޮގެ އަހުމަދު ސައީދު (އައްމަޓީ) އެވެ.

މި ފަހަރުގެ މުބާރާތުގައި ޖުމްލަ 10 ޓީމެއް ވާދަކުރާއިރު، މުބާރާތުގެ ކުޅުން ކުރިއަށްދަނީ ދެ ގްރޫޕަކަށް ބަހާލައިގެންނެވެ. މުބާރާތުގެ ކޮންމެ ގްރޫޕެއްގެވެސް އެއްވަނަ އަދި ދެވަނަ ޓީމު ސެމީ ފައިނަލަށް ދަތުރުކުރާގޮތަށް ރޭވިފައިވާ މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 27 ވަނަ ދުވަހުއެވެ.