ENGLISH
04 އޭޕްރީލު 2025
އެޓަލާންޓާ އަށް ލީގު ކާމިޔާބު ކުރެވިދާނެ: ގަސްޕެރީނީ
10 މާރިޗު 2025
|
އެޓަލާންޓާގެ ކޯޗު، ގަސްޕެރީނީ. ފޮޓޯ: ރޮއިޓާސް
އެންމެ މަޤްބޫލު
އެޓަލާންޓާ އަށް އިޓާލިއަން ލީގުގެ ޗެމްޕިއަންކަން ހޯދުމުގެ އުއްމީދު ކުރެވިދާނެ ކަމަށް އެ ޓީމުގެ ކޯޗު، ޖިއާން ޕިއެރޯ ގަސްޕެރީނީ ބުނެފިއެވެ.
ގަސްޕެރީނީ މިހެން ބުނީ، ރަށުން ބޭރުގައި ޔުވެންޓަސް އަތުން 4-0 އިން އެޓަލާންޓާ މޮޅުވި މެޗަށްފަހު ބޭއްވި ނޫސްވެރިންގެ ބައްދަލުވުމުގައެވެ.
ޔުވެންޓަސްގެ ދަނޑުގައި ކުޅުނު މެޗުގައި އެޓަލާންޓާ އިން ތަފާތު މޮޅު ކުޅުމެއްދައްކާފައިވާއިރު، މި ކާމިޔާބީއާއެކު އެ ޓީމު ވަނީ ލީގުގެ އެއްވަނައިގައި އުޅޭ އިންޓަރ މިލާނާ ތިން ޕޮއިންޓާ ގާތަށް ޖެހިލައިފައެވެ. އަދި، ކުރީން ފަހަތުގައި ވިއްދާފައި އޮތް ޔުވެންޓަސްއާ އެ ޓީމުން ހަ ޕޮއިންޓާ ދުރަށް ޖެހިލައިފައިވެއެވެ.
އަންނަ ހަފްތާގައި އިންޓަރއާ ދެކޮޅަށް ނުކުންނައިރު، ޔުވެންޓަސްގެ ދަނޑުގައި ހޯދި މި ކާމިޔާބީގެ މުހިއްމުކަން އެޓަލާންޓާގެ ކޯޗު، ގަސްޕެރީނީ ވަނީ ފާހަގަކޮށްފައެވެ.
ރޭގެ މެޗުގައި އެޓަލާންޓާގެ ފޯވާޑް، ރެޓޭގީ ޕެނަލްޓީސްޕޮޓް މަތިން ބޯޅަ ފޮނުވާލަނީ. --ފޮޓޯ: ރޮއިޓާސް
ގަސްޕެރީނީ ބުނީ، ރޭގެ މެޗުން ހޯދި މޮޅަށްފަހު އެޓަލާންޓާގެ ކުޅުންތެރިން ދެކެމުންއަންނަ ހުވަފެންތަކަށް ހުރަސްއަޅައިގެންނުވާނެ ކަމަށާއި، އެއީ ނުކުރެވޭނެ ކަމެއްގެ ގޮތުގައި ބެލެވުނު ނަމަވެސް، އެކަން ހާސިލްކުރެވިދާނެ ކަމަށެވެ.
"އަހަރެމެންނަށް އެނގޭ އިންޓަރ އާއި [ދެވަނައިގައި އޮތް] ނަޕޯލީ އަކީ ވަރަށް ވަރުގަދަ ޓީމުތައް ކަން. އަހަރެމެން މިވަނީ އިންޓަރއާ ދެކޮޅަށް އެންމެ ފަހުން ކުޅުނު ހަތް މެޗުން ވެސް ބަލިވެފަ. އެއީ ވެސް އެކަމުގެ އިޝާރާތެއް ކަމަށް ވެދާނެ."
"އެހެންނަމަވެސް، މިހާތަނަށް ދުވަހަކުވެސް ސީޒަނެއްގެ މިހާ ހިސާބަށް އައިއިރު ލީގު ރޭހުގައި ވާދަކޮށްފައެއްނުވޭ. އެހެންވީމާ ކޮންމެ ގޮތަކަށް ވެސް ނަތީޖާ ނިކުމެދާނެ،" ގަސްޕެރީނީ ބުންޏެވެ.
ގަސްޕެރީނީ ބުނީ، ޔުވެންޓަސް ކަހަލަ ރަނގަޅު ފޯމެއްގައި އޮތް ޓީމަކާ ދެކޮޅަށް އެފަދަ ނަތީޖާއެއް އެޓަލާންޓާ އަށް ނެރެވިދާނެ ކަމަށް ޚިޔާލުކުރަން އުނދަގޫ ނަމަވެސް، އެކަން ހާސިލްކުރުމުން އެ ނަތީޖާއިން އެތައް ކަމެއް ދޭހަވާ ކަމަށެވެ.
އެޓަލާންޓާގެ ލުކްމަން (ވ) ޔުވެންޓަސްގެ ކުޅުންތެރިއެއް ކައިރިން ބޯޅަ ހިފައިގެންދާނެ މަސައްކަތްކުރަނީ. --ފޮޓޯ: އޭޕީ
މީގެއިތުރުން، ގަސްޕެރީނީ ވަނީ، އެ ޓީމުގެ ނައިޖީރިއާ ފޯވާޑް، އަޑެމޯލާ ލުކްމަން އަށް ވެސް ތައުރީފުކޮށްފައެވެ. މިއީ ދާދިފަހުން، ޔުއެފާ ޗެމްޕިއަންސް ލީގުގެ ނޮކްއައުޓް ބުރުގެ ޕްލޭއޮފްގައި ބެލްޖިއަމްގެ ކުލަބު ބްރޫޖް އަތުން ބަލިވި މެޗަށްފަހު ލުކްމަން އަށް ފާޑުކީ ފަހުން ގަސްޕެރީނީގެ ފަރާތުން އޭނާއާ ބެހޭގޮތުން ވާހަކަ ދެއްކި ފުރަތަމަ ފަހަރެވެ.
ގަސްެޕެރީނީ ބުނީ، އެކި މީހުން އެކި ގޮތަށް ދެކެފާނެ ކަމަށާއި، ޓީމާ މެދު ލުކްމަން ވިސްނަން ފެށުމުން ކުރިއަށްވުރެ ވެސް މޮޅު ކުޅުންތެރިއަކަށް އޭނާ ވެފައިވާ ކަމަށެވެ.
އެޓަލާންޓާ މޮޅުކޮށްދިނުމުގައި ލުކްމަންގެ ހިއްސާ ބޮޑު ކަމަށާއި، ޚުދު އޭނާ ވެސް މިހާރު ހުރި މަގާމަށް ގެނައުމުގައި އެ ކުލަބު މުހިއްމު ދައުރެއް އަދާކޮށްފައިވާ ކަމަށް ވެސް ގަސްޕެރީނީ ބުނެފައިވެއެވެ.
ގަސްޕެރީނީގެ ވާހަކަތައް ނިންމާލަމުން ބުނީ، އޭނާ ގަބޫލުކުރާ ގޮތުގައި އެޓަލާންޓާގެ ކެޕްޓަންކަން ވެސް ލުކްމަން ކުރާނެ ކަމަށާއި، އެއީ ލުކްމަން އަށް ޚާއްސަ ކުލަބެއް ކަމަށެވެ.