ސޫރިޔާގެ ކުރީގެ ރައީސް ބައްޝާރުލް އަސަދު ނިސްބަތްވެ ވަޑައިގަންނަވާ އަލް ޢަލަވީ ދަރިކޮޅުގެ މީހުންނާ ދެކޮޅަށް ސޫރިޔާގެ އަސްކަރިއްޔާއިން ހިންގަމުންދާ އޮޕަރޭޝަންގައި ހާހެއްހާ މީހުން މަރާލާފައިވާކަމުގެ ތުހުމަތުގެ ފުރިހަމަ ތަހުޤީޤެއް ހިންގާނެކަމަށް ސޫރިޔާގެ މިހާރުގެ ލީޑަރު ވިދާޅުވެއްޖެއެވެ.

ސީރިޔަން އޮބްޒަރވޭޓަރީ ފޯ ހިޔުމަން ރައިޓްސް (އެސްއޯއެޗްއާރު)އިން ލަފާކުރާ ގޮތުގައި، މި މަހުގެ 6 ވަނަ ދުވަހު ސޫރިޔާގެ އަސްކަރިއްޔާއިން ހިންގަމުންދާ އޮޕަރޭޝަންގައި މިހާތަނަށް ހާހެއްހާ މީހުން ވަނީ މަރާލައިފައެވެ.

އަދި މިއީ ޢަލަވީންގެ ނަސްލުހޭދަ ކުރުމުގެ ޢަމަލެއްގެ ގޮތުގައި ވެސް އެ ޖަމްޢިއްޔާއިން ވަނީ ސިފަކޮށްފައެވެ.

ސޫރިޔާގެ އެކި ހިސާބުތަކުގައި އަސަދަށް ވަފާތެރި ހަނގުރާމަވެރިންނާ ދެމެދު ވަރުގަދަ ކުރިމަތިލުންތަކެއް ދަނީ ހިނގަމުންނެވެ.

މިއީ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން ދިމިޝްޤަށް އަރައި އަސަދުގެ ސަރުކާރު 2024 ވަނަ އަހަރުގެ ޑިސެންބަރު މަހުގެ 8 ވަނަ ދުވަހު ވައްޓައިލި ފަހުން، އެ ޤައުމުގައި ހިނގި އެންމެ ވަރުގަދަ ކުރިމަތިލުންތަކެވެ.

އެކަމާ ގުޅިގެން، ސޫރިޔާގެ އިންތިޤާލީ ލީޑަރު އަޙުމަދު އަލް ޝަރާޢު ވިދާޅުވީ، ޤަވާއިދާ ޚިލާފަށް އެކަށީގެންނުވާ މިންވަރު ބޭނުންކޮށް، އާންމުން މަރާލުމުގައި އެއްވެސް މީހަކު ބައިވެރިވެފައިވާނަމަ، އެ މީހަކަށް ނުވަތަ ބަޔަކަށް ހައްޤު އަދަބު ދޭނެ ކަމަށެވެ.

އަދި އެކަމުގެ ތަހުޤީޤަށް ޙާއްސަ ކޮމިޓީއެއް އެކުލަވާލާފައިވާ ކަމަށް ޝަރާޢު ވިދާޅުވިއެވެ.

ސޫރިޔާގައި ހިނގަމުންދާ ކުރިމަތިލުންތަކާ ގުޅިގެން އދ. އިން ވަނީ ކަންބޮޑުވުން ފާޅުކޮށްފައެވެ.