ENGLISH
04 އޭޕްރީލު 2025
އަސީރުން ދޫކޮށްލަން މަޖުބޫރުކުރުވަން، ޣައްޒާއިން ކަރަންޓު ކަނޑާލައިފި
10 މާރިޗު 2025
|
އެންމެ މަޤްބޫލު
ޙަމާސް ޖަމާޢަތުގެ ބަލުމުގެ ދަށުގައި މިހާރު ތިބި އަސީރުން މިނިވަންކުރަން މަޖުބޫރުކުރުވަން، ފަލަސްތީނުގެ ޣައްޒާއިން ކަރަންޓުގެ ޚިދުމަތް ކަނޑައިލަން އިޒްރޭލުގެ ސަރުކާރުން އަންގައިފިއެވެ.
ޣައްޒާއަށް ކޮންމެހެން ބޭނުންޖެހިފައިވާ އިންސާނީ އެހީ ވެެއްދުމުގެ މަގުތައް އިޒްރޭލުން ބަންދުކޮށްފައިވާ ދަނޑިވަޅެއްގައި، ޣައްޒާއިން ކަރަންޓު ކަނޑައިލުމަކީ "ބްލެކްމެއިލް"ގެ ޢަމަލެއްގެ ގޮތުގައި ޙަމާސްއިން ވަނީ ސިފަކޮށްފައެވެ.
މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.
އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ. ނަމަވެސް އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.
އެކަން އެހެން އޮއްވައި، އިޒްރޭލުން ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.
އެ ހުށަހެޅުމަށް ޙަމާސްއިން ނޫނެކޭ ބުނުމާއެކު، އިޒްރޭލުން މިހާރު ވަނީ އެ ހުށަހެޅުމަށް އެއްބަސްކުރުވަން، ޣައްޒާއަށް އެހީ ވެއްދުމުގެ މަގުތައް ވަގުތީ ގޮތުން ބަންދުކޮށްފައެވެ.
އިޒްރޭލުގެ ހަކަތައާބެހޭ ވަޒީރު ބުނީ، ވަގުތުން ވަގުތަށް ޣައްޒާއިން ކަރަންޓު ކަނޑައިލަން އަންގާފައިވާ ކަމަށާއި، ބާކީ ތިބި އަސީރުން މިނިވަންކުރަން ކޮންމެ ކަމެއް ކުރަން ވެސް ތައްޔާރު ކަމަށެވެ.
އިޒްރޭލުގެ ޢުދުވާނުތަކުގައި ސުންނާފަތިވެފައިވާ ޣައްޒާގައި ގިނަ ބަޔަކު ޓެންޓުތަކުގައި ދިރިއުޅެމުންދާއިރު، މިހާރު އޮތް ފިނި މޫސުމުގައި ކަރަންޓު ކަނޑައިލުމުން އެތަނުގެ ރައްޔިތުން ތަޙައްމަލުކުރަންޖެހިފައިވާ ނިކަމެތިކަން އެތައް ގުނައެއް އިތުރުވެގެންދާނެ އެވެ.
ޣައްޒާއިން ކަރަންޓު ކަނޑާލާފައިމިވަނީ، އެއްބަސްވުމުގެ ދެވަނަ ފިޔަވަހީގެ މަޝްވަރާތައް ފަށަން ތައްޔާރުކަމުގެ އިޝާރާތެއް ވެސް ދީފައިވަނިކޮށެވެ.