ENGLISH

04 އޭޕްރީލު 2025

Advertisement

ޣައްޒާ އަލުން ބިނާކުރަން އަރަބިން ހުށަހެޅި ޕްލޭނަށް ޔޫރަޕުގެ ލީޑަރުންގެ ވެސް ތާއީދު

09 މާރިޗު 2025

|

ހަސަން އާމިރު

ފަލަސްތީނުގެ ޣައްޒާ އަލުން ބިނާކުރަން އަރަބި ޤައުމުތަކުން ހުށަހަޅާފައިވާ ޕްލޭނަށް ޔޫރަޕުގެ ގިނަ ލީޑަރުން ވެސް ތާއީދުކޮށްފިއެވެ.

ޣައްޒާ އަލުން ބިނާކުރުމުގެ ޕްލޭނެއް އެކުލަވައިލަން އަރަބި ޤައުމުތަކުން އިސްނެގީ، ޣައްޒާ އަމިއްލަކޮށްލައި، އެތަން ތަރައްޤީ ކުރަން، އެތަނުގައި ދިރިއުޅޭ 2.4 މިލިއަނެއްހާ ފަލަސްތީނުގެ ރައްޔިތުން ބާލަން އެމެރިކާގެ ރައީސް ޑޮނަލްޑް ޓްރަމްޕް ކުއްލި ގޮތަކަށް ހުށަހެޅުއްވުމުންނެވެ.

ޓްރަމްޕްގެ އެ ޕްލޭންގައި ޣައްޒާގެ ރައްޔިތުން އަރަބި ބައެއް ޤައުމުތަކަށް ގެންދިޔުން ހިމެނެއެވެ.

މިޞްރުން އިސްވެ ހުށަހެޅި 91 ސަފުހާގެ ޕްލޭނުގައި ވަނީ ޣައްޒާގައި އިމާރާތްތަކާއި ވަޞީލަތްތައް ބިނާކުރުމުގެ އިތުރަށް ފަލަސްތީނުގެ ރައްޔިތުންގެ ހައްޤުތަކާއި ސަލާމަތީ ކަންކަން ބެލެހެއްޓުން ވަރަށް ތަފްޞީލުކޮށް ހިމަނައިފައެވެ.

ނަމަވެސް، އެ ޕްލޭން ހަޤީޤަތާ ދުރުކަމަށް ބުނެ، އެ ޕްލޭން ބަލައިގަންނަން އިޒްރޭލާއި އެމެރިކާ ދެކޮޅު ހަދާފައިވަނިކޮށް، ފްރާންސް، ޖަރުމަނު، އިޓަލީ އަދި އިނގިރޭސިވިލާތުގެ ޚާރިޖީ ވަޒީރުން ވަނީ، އަރަބިންގެ ޕްލޭން ހަޤީޤަތާ އެއްގޮތް ކަމަށް ވިދާޅުވެ، އެ ޕްލޭނަށް ތާއީދުކުރާކަން ހާމަކުރައްވައިފައެވެ.

އަދި އެ ޕްލޭންގެ ދަށުން، ޣައްޒާއަށް މިހާރު ކުރިމަތިވެފައިވާ ނިކަމެތި ޙާލަތަށް، އަވަސް ހައްލުތަކެއް އެ ޕްލޭނުގެ ދަށުން ހޯދައިދެވޭކަން އެ ޤައުމުގެ ޚާރިޖީ ވަޒީރުން ގުޅިގެން ނެރުއްވި ބަޔާނެއްގައި ބުނެފައިވެއެވެ.

މި ޕްލޭނަށް ގާތްގަނޑަކަށް 53 ބިލިއަން އެމެރިކާ ޑޮލަރު ޚަރަދުވާނެ ކަމަށް ބެލެވޭއިރު، އެ ފައިސާ ހޯދުމަށް، އަންނަ މަހު ބައިނަލްއަޤުވާމީ ބައްދަލުވުމެއް ބާއްވަން ވަނީ ހުށަހަޅައިފައެވެ.

ޙަމާސް ޖަމާޢަތް ނައްތާލުމުގެ ނަމުގައި، 7 އޮކްޓޯބަރު 2023 ގައި އިޒްރޭލުން ޣައްޒާއަށް ދޭން ފެށި ޢުދުވާނުތަކުގައި މުޅި ޣައްޒާ ވަނީ ސުންނާފަތިވެފައެވެ. އދ. އިން ލަފާކުރާ ގޮތުގައި ޣައްޒާގެ 90 ޕަސެންޓު ގެތަކަށް ވަނީ އިޒްރޭލުގެ ޙަމަލާތަކުގައި ގެއްލުން ލިބިފައެވެ.

އަދި ހޮސްޕިޓަލުތަކާއި އިންޖީނުގެތަކާއި ނަރުދަމާ ނިޒާމުތަކަށް ވެސް ބޮޑެތި ގެއްލުންތައް ލިބި، އަސާސީ ޚިދުމަތްތަކަށް ބުރޫއަރާފައިވާ ކަމަށް ވެސް އދ. އިން ބުނެއެވެ.

ކިޔުންތެރިންގެ ހިޔާލު