ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމާ ކަނޑައެޅިގެން ޚިލާފަށް ޣައްޒާއަށް އެހީ ވެއްދުން އިޒްރޭލުން ހުއްޓުވާފައި އޮތް އޮތުން ނިމުމަކަށް ގެންނަން ޔަމަނުގައި ހަރަކާތްތެރިވާ ހަނގުރާމަވެރި ހޫތީ ޖަމާޢަތުން އިޒްރޭލަށް ހަތަރު ދުވަހުގެ މުޙުލަތެއް ދީފިއެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ. ނަމަވެސް އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.

އެކަން އެހެން އޮއްވައި، އިޒްރޭލުން ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.

އެ ހުށަހެޅުމަށް ޙަމާސްއިން ނޫނެކޭ ބުނުމާއެކު، އިޒްރޭލުން މިހާރު ވަނީ އެ ހުށަހެޅުމަށް އެއްބަސްކުރުވަން، ޣައްޒާއަށް އެހީ ވެއްދުމުގެ މަގުތައް ވަގުތީ ގޮތުން ބަންދުކޮށްފައެވެ.

ހޫތީ ޖަމާޢަތުގެ ވެރިޔާ ޢަބްދުލްމަލިކް އަލް-ޙޫޠީ ބުނީ ޣައްޒާއަށް އެހީގެ ސާމާނު އެތެރެ ކުރުމަށް އޮތް ހުރަސްތައް ނައްތައިލުމަށް އިޒްރޭލަށް ހަތަރު ދުވަހުގެ މުޙުލަތެއް ދީފައިވާނެ ކަމަށެވެ.

"އަޅުގަނޑުމެން ހަތަރު ދުވަހުގެ މުޙުލަތެއް ދޭނަން. މިއީ، 'ޣައްޒާގެ ސުލްޙައިގެ އެއްބަސްވުން އެކުލަވައިލި މެދުވެރިންގެ' މަސައްކަތްތައް ނިންމުމަށް ދީފައިވާ މުޙުލަތެއް. ހަތަރު ދުވަހުގެ މުޙުލަތަށް ފަހު އިޒްރޭލުން ޣައްޒާއަށް އެހީ އެތެރެ ކުރުމަށް ހުރަސް އަޅާނަމަ، އިޒްރޭލާ ދެކޮޅަށް އަލުން އަސްކަރީ އޮޕަރޭޝަން ފަށާނަން،" އޭނާ އިންޒާރު ދިނެވެ.

އިޒްރޭލުން ޣައްޒާއަށް 2023 ވަނަ އަހަރުގެ އޮކްޓޯބަރު މަހު ޙަމަލާތައް ދޭން ފެށުމާއެކު، އެ ޢުދުވާނުގެ ރައްދުގައި ހޫތީން ވަނީ ރަތް ކަނޑު ހުރަސްކޮށް ދަތުރު ކުރާ އާގުބޯޓުފަހަރަށް އަމާޒުކޮށް ޙަމަލާތަކެއް ދީފައެވެ. މިގޮތުން މިހާތަނަށް 100 އަށް ވުރެ ގިނަ އުޅަނދަށް ޙަމަލާދީފައިވާއިރު، އިޒްރޭލަށް އަމާޒުކޮށް ނުރައްކާތެރި ވައިގެ ޙަމަލާތަކެއް ވެސް ދީފައިވެއެވެ.