އީރާނުން ކުރިއަށް ގެންދާ ނިއުކްލިޔަރ ޕްރޮގުރާމާ ގުޅޭ ގޮތުން އެއްބަސްވުމެއް އެކުލަވައިލުމާ މެދު މަޝްވަރާ ކުރުމަށް އެމެރިކާގެ ރައީސް ޑޮނަލްޑް ޓްރަމްޕް ފޮނުއްވި ކަމަށް ވިދާޅުވެފައިވާ ސިޓީ ލިބިފައިނުވާ ކަމަށް އީރާނުން ބުނެފިއެވެ.

އެމެރިކާއާއި އީރާނާ ދެމެދު މަޝްވަރާތައް ބޭއްވުމަށް އީރާނުގެ ރޫހާނީ ލީޑަރު އާޔަތުﷲ ޢަލީ އަލް ޚާމަނާއީ އަަށް ދަޢުވަތު އަރުވައި ސިޓީއެއް ފޮނުއްވާފައިވާކަން ޓްރަމްޕް ހާމަކުރައްވާފައި ވަނީ އެމެރިކާގެ ޓީވީއަކަށް ދެއްވި ބަސްދީގަތުމެއްގައެވެ.

ނަމަވެސް، އެފަދަ ސިޓީއެއް އަދި މިހާތަނަށް ލިބިފައިނުވާ ކަމަށް އެމެރިކާގައި ހުންނަ އީރާނުގެ އެމްބަސީން ބުންޏެވެ.

ޓްރަމްޕް ވިދާޅުވީ، އީރާނުގެ ނިއުކްލިޔަރ ޕްރޮގުރާމާ ގުޅޭ ގޮތުން އެ ޤައުމާ އެކު އެއްބަސްވުމެއް އެކުލަވައިލުމަށް އެމެރިކާއިން ބޭނުންވާ ކަމުގައެވެ.

އޭނާ ވިދާޅުވީ، މި ކަމާ ގުޅޭ ގޮތުން ކުރިއަށް އޮތް ދުވަސްތަކުގައި ފިޔަވަޅުތަކެއް އެޅޭނެ ކަމަށް އުންމީދު ކުރައްވާ ކަމުގައެވެ. ނަމަވެސް، އެއީ ކޮން ފިޔަވަޅުތަކެއް ކަން އޭނާ ސާފު ކޮށްދެއްވާފައެއް ނުވެއެވެ.

ނަމަވެސް، އީރާނާ ދެކޮޅަށް އެމެރިކާއިން ދަތިކުރުމުގެ ފިޔަވަޅުތައް އަޅާފައި އޮތްހާ ހިނދަކު އެމެރިކާ އާއެކު ކުރާނެ މަޝްވަރާއެއް ނޯންނާނެ ކަމަށް އީރާނުގެ ޚާރިޖީ ވަޒީރު އައްބާސް އަރާޤްޗީ ވަނީ ވިދާޅުވެފައެވެ.

ޓްރަމްޕްގެ ފުރަތަމަ ވެރިކަމުގައި ވަނީ 2015 ވަނަ އަހަރު އީރާނާއި ދުނިޔޭގެ ބޮޑެތި ބާރުތަކާ ދެމެދު ވެފައިވާ ނިއުކްލިއަރ އެއްބަސްވުމުން އެމެރިކާ ވަކިކޮށްފައެވެ. އެއަށް ފަހު އީރާނާ ދެކޮޅަށް ދަތިކުރުމުގެ ފިޔަވަޅުތަކެއް އަޅައިފައެވެ. އެމެރިކާއިން އެ ގޮތަށް ޢަމަލު ކުރުމުން އީރާނުން ވަނީ ނިއުކްލިއަރ އެއްބަސްވުމާ ޚިލާފަށް ޢަމަލު ކުރަން ފަށައި، ނިއުކްލިއަރ ބާރަކަށް ވުމުގެ މަސައްކަތް އަވަސްކޮށްފައެވެ.