ޔުއެފާ ކޮންފަރެސް ލީގުގެ ގަދަ 16 ގެ ބުރުގައި ރޭ ކުޅުނު މެޗުގައި ޑެންމާކްގެ ކޯޕަންހޭގަން އަތުން 2-1 އިން ޗެލްސީ މޮޅުވެ، ރެކޯޑް ދަމަހައްޓައިފިއެވެ.

މިއީ ޔޫރަޕްގެ ތިންވަނަ ފަންތީގެ މުބާރާތުގައި ޗެލްސީ މޮޅުވި ހަތްވަނަ މެޗެވެ. އެ ޓީމު ވަނީ މުބާރާތުގެ ލީގު ފިޔަވަހީގެ ބުރުގައި ކުޅުނު ހަ މެޗު ވެސް ކާމިޔާބުކޮށްފައެވެ. މިހާތަނަށް މި މުބާރާތުގައި ސައްތައިން ސައްތައިގެ ރެކޯޑެއް އޮތް ހަމައެކަނި ޓީމަކީ ވެސް ޗެލްސީ އެވެ.

ކޯޕަންހޭގަންގެ ދަނޑުގައި ކުޅުނު މެޗުގައި ޗެލްސީގެ ލަނޑުތައް ޖަހައިދިނީ ކެޕްޓަން، ރީސް ޖޭމްސް އާއި އެންޒޯ ފެނާންޑޭޒް އެވެ.

ކޯޕަންހޭގަންގެ ހަމައެކަނި ލަނޑުޖެހީ ގެބްރިއެލް ޕެރޭރާ އެވެ.

މި މެޗުގައި ޗެލްސީގެ އިނގިރޭސި މިޑްފީލްޑަރު، ކޯލް ޕާމާ ކުޅެފައިވާއިރު، މިއީ މި އަހަރުގެ މުބާރާތުގައި އޭނާގެ ފުރަތަމަ ފެނިލުމެވެ.