ސޫރިޔާގެ އަސްކަރިއްޔާ އާއި އެ ޤައުމުގެ ކުރީގެ ރައީސް ބައްޝާރުލް އަސަދަށް ވަފާތެރި ހަނގުރާމަވެރިންނާ ދެމެދު ވަރުގަދަ ކުރިމަތިލުންތަކެއް ހިނގައި، އެތައް ބަޔަކު މަރުވެފައިވާ ކަމަށް ކަމާގުޅޭ އިދާރާތަކުން ބުނެފިއެވެ.

މިއީ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން ދިމިޝްޤަށް އަރައި އަސަދުގެ ސަރުކާރު 2024 ވަނަ އަހަރުގެ ޑިސެންބަރު މަހުގެ 8 ވަނަ ދުވަހު ވައްޓައިލި ފަހުން، އެ ޤައުމުގައި ހިނގި އެންމެ ވަރުގަދަ ކުރިމަތިލުންތަކެވެ.

ސޫރިޔާގެ ހައްޤުތަކާބެހޭ ޖަމްޢިއްޔާއިން ބުނީ، އެ ކުރިމަތިލުންތަކުގައި މިހާތަނަށް 70 އަށް ވުރެ ގިނަ މީހުން މަރުވެފައިވާ ކަމަށެވެ.

އަދި އެންމެ ވަރުގަދައަށް ޙަމަލާތައް ބަދަލުކުރަމުންދާ، ސޫރިޔާގެ ލަތާކިޔާ އާއި ތަރުތޫސްގައި ކާފިއު ހިންގާފައިވާ ކަމަށް އެ ޖަމްޢިއްޔާއިން ބުންޏެވެ.

މި ކުރިމަތިލުންތައް ފެށުނީ، އެޗްޓީއެސްގެ ސިފައިން ހިންގަމުންދާ އަސްކަރީ އޮޕަރޭޝަނެއްގެ ތެރެއިން، ހަނގުރާމަވެރިން ކުއްލި ގޮތަކަށް ޙަމަލާ ދިނުމުންނެވެ.

މި ހަމަނުޖެހުންތައް ޚަލަބްގެ އިތުރުން ޙުމްސްއަށް ވެސް މިހާރު ފެތުރިފައިވާ ކަމުގެ މަޢުލޫމާތު ދަނީ ލިބެމުންނެވެ.