ފަލަސްތީނުގެ ހައްޤުގައި މަސައްކަތްކުރާ ޙަމާސް ޖަމާޢަތަށް އެމެރިކާގެ ރައީސް ޑޮނަލްޑް ޓްރަމްޕް ބިރު ދައްކައި، އިންޒާރުތައް ދެއްވަމުން ގެންދެވުމަކީ، ޣައްޒާގައި ޙަމަލާތައް ހުއްޓައިލުމުގެ އެއްބަސްވުމާ ކަނޑައެޅިގެން ޚިލާފަށް ޣައްޒާއަށް އެހީ ވެއްދުން އިޒްރޭލުން ހުއްޓުވާފައި އޮތް އޮތުމަށް ތާއީދުކުރުން ކަމަށް އެ ޖަމާޢަތުން ސިފަކޮށްފިއެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ. ނަމަވެސް އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.

އެކަން އެހެން އޮއްވައި، އިޒްރޭލުން ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.

އެ ހުށަހެޅުމަށް ޙަމާސްއިން ނޫނެކޭ ބުނުމާއެކު، އިޒްރޭލުން މިހާރު ވަނީ އެ ހުށަހެޅުމަށް އެއްބަސްކުރުވަން، ޣައްޒާއަށް އެހީ ވެއްދުމުގެ މަގުތައް ވަގުތީ ގޮތުން ބަންދުކޮށްފައެވެ.

ދެވަނަ ފިޔަވަހި ފެށުމަށް އިޒްރޭލަށް ބާރު އެޅުއްވުމުގެ ބަދަލުގައި، ޙަމާސްގެ ބެލުމުގެ ދަށުގައި ބާކީ ތިބި އަސީރުން ވަގުތުން މިނިވަންކުރަން ގޮވާލައްވައި، ޓްރަމްޕް ގެންދަވަނީ އެ ޖަމާޢަތަށް ތަކުރާރުކޮށް އިންޒާރުތައް ދެއްވަމުންނެވެ.

ޙަމާސްއިން ބުނީ، އެ ޖަމާޢަތަށް އިންޒާރުތައް ޓްރަމްޕް އިސްވެ ދެއްވުމަކީ، ޣައްޒާގެ ނިކަމެތި ރައްޔިތުން ބަނޑަށް ޖައްސަން ހިތްވަރު ދިނުން ކަމަށެވެ.

އަދި އެންމެ އަވަހަށް ބާކީ ތިބި އަސީރުން މިނިވަންކުރަން އޮތް މަގަކީ، މިހާރުން މިހާރަށް ސުލްޙައިގެ އެއްބަސްވުމުގެ ދެވަނަ ފިޔަވަހި ތަންފީޒުކުރަން ފެށުން ކަމަށެވެ.