ENGLISH

04 އޭޕްރީލު 2025

Advertisement

އެމެރިކާގެ ސިޔާސަތަށް ބޮޑު ބަދަލެއް؛ ހަމާސްއާއެކު ސީދާ ވާހަކަތައް ފަށައިފި

07 މާރިޗު 2025

|

ޝިފްޒާން އަޙްމަދު

ރަހީނުން މިނިވަންކުރުމާމެދު އެމެރިކާގެ ފަރާތުން ހަމާސްއާ މަޝްވަރާކުރައްވާ މަންދޫބު އެޑަމް ބޮއެލާ، ފޮޓޯ: ރޮއިޓާސް

އެމެރިކާއިން ދަމަހައްޓަމުން އައިސްފައިވާ، އެގައުމުން ޓެރަރިސްޓު ގުރޫޕުތައް ކަމުގައި ކަނޑައަޅާފައިވާ ގުރޫޕުތަކާއެކު ސީދާ މަޝްވަރާނުކުރުމުގެ ސިޔާސަތު ދޫކޮށް ޙަމާސްއާއެކު ސީދާ މަޝްވަރާކުރަން ރައީސް ޑޮނާލްޑް ޓުރަމްޕުގެ ސަރުކާރުން ފަށައިފިއެވެ. 

މި ބައްދަލުވުމަކީ ހަމާސްއިން ރަހީނުކޮށްފައިވާ އެންމެން މިނިވަންކޮށް ޣައްޒާގައި ކުރިއަށްދާ ހަނގުރާމަ ނިމުމަކަށް ގެނައުމަށް ޓުރަމްޕު ބާރުއަޅުއްވަމުންދާ ދަނޑިވަޅެއްގައި ކުރިއަށްގެންދިޔަ ބައްދަލުވުމެކެވެ. މީގެ ކުރިން ބައިޑެން ސަރުކާރުން މުޅިންވެސް މަސައްކަތްކޮށްފައިވަނީ މެދުވެރިންގެ ޒަރީއާއިން ހަމާސްއާއެކު މަޝްވަރާކޮށްގެންނެވެ. 

ފުރަތަމަ ފަހަރަށް އެމެރިކާގެ މަސްއޫލުވެރިޔަކު ޙަމާސްގެ ލީޑަރުންނާ ބައްދަލުކުރައްވާފަައިވަނީ ޤަޠަރުގެ ވެރިރަށް ދޯހާގައެވެ. އެ ބައްދަލުވުމުގައި ބައިވެރިވެވަޑައިގަތީ ރަހީނުންނާ ގުޅޭ އެމެރިކާގެ ހާއްސަ މަންދޫބު އެޑަމް ބޮއެލާއެވެ. އެ ބައްދަލުވުމުގެ މައުޟޫއަކީ އެމެރިކާއަށް ނިސްބަތްވާ ރަހީނުން މިނިވަންކުރުމެވެ. 

އެ ބައްދަލުވުމާ ގުޅޭ ގޮތުން ނޫސްވެރިން ސުވާލުކުރުމުން ވައިޓްހައުސްގެ ތަރުޖަމާން ކެރޮލައިން ލެވިޓް އެ ބައްދަލުވުން ކުރިއަށްދިޔަކަން ދޮގުނުކުރައްވައި ވިދާޅުވީ ބޮއިލާ ބައްދަލުކުރައްވަން ބޭނުންފުޅުން ކޮންމެ ފަރާތަކާ ބައްދަލުކުރެއްވޭނެ ކަމަށެވެ. 

އިސްރާއީލުގެ އޮފިޝަލުންނާ ހަވާލާދީ ވޮޝިންޓަން ޕޯސްޓުން ރިޕޯޓުކުރި ގޮތުގައި މި ބައްދަލުވުންތައް ކުރިއަށްދާކަން އެމެރިކާއިން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް އަންގާފައިނުވެއެވެ. އަދި އެ އޮފިޝަލުން ވިދާޅުވި ގޮތުގައި އިސްރާއީލުގެ ރަހީނުން ނުހިމެނޭ ގޮތަށް ވަކިން އެމެރިކާއަށް ނިސްބަތްވާ ރަހީނުން މިނިވަންކުރުމުގެ އެއްބަސްވުމެއް ހަމާސްއާއެކު ގާއިމުކުރެވިއްޖެނަމަ އެކަންވާނީ އިސްރާއީލުގައި ނަތަންޔާހޫގެ މަގުބޫލުކަން އިތުރަށް ހީނަރުވެދާނެ ލަދުވެތި ހާލަތަކަށެވެ. 

އެމެރިކާއާއި ހަމާސްގެ ދެމެދުގައި ކުރެވުނު މަޝްވަރާތައް މައިގަނޑު ގޮތެއްގައި އަމާޒުކުރެވުނީ އެމެރިކާއާއި އިސްރާއީލުގެ ރައްޔިތެއްކަމަށްވާ އީޑަން އެލެގްޒެންޑާ މިނިވަންކުރުމާއެކު، މަރުވެފައިވާ އެމެރިކާއާއި އިސްރާއީލުގެ ރަައްޔިތުންކަމަށްވާ އިޓޭ ޗެންއާއި އޮމެރް ނިއުޓްރާއާއި ގާޑް ހައްގާއީ އަދި ޖުޑީ ވެއިންސްޓެއިންގެ ހަށިތައް ދޫކުރުމުގެ މައްޗަށެވެ. 

އެމެރިކާއިން ޙަމާސްއަކީ ނިރުބަވެރި ޖަމާއަތެއްކަމަށް ކަނޑައެޅީ 1997 ވަނަ އަހަރުއެވެ. އެއީ ޣައްޒާގެ އިންތިޚާބުތައް އެ ޖަމާޢަތަށް ކާމިޔާބުކުރެވުމުގެ އަހަރުތަކެއް ކުރިއެވެ. ނިރުބަވެރި ޖަމާއަތެއްކަމަށް ކަނޑައެޅި ފަހުން އެމެރިކާއިން ޙަމާސްއާއެކު ސީދާ ވާހަކަދައްކައި މަޝްވަރާކޮށްފައިނުވެއެވެ. 

ހަމަލާ ބަދަލުކުރުން ހުއްޓައިލާ ރަހީނުން ދޫކޮށްލުމުގެ އެއްބަސްވުމަކަށް ވާސިލުވުމަށް ޖޯ ބައިޑަންގެ ސަރުކާރުންވެސް މަސައްކަތްކުރިއެވެ. ނަމަވެސް އެ މަސައްކަތުގައި އެއިރު އެމެރިކާއިން ހަމާސްއާ މަޝްވަރާކުރީ ޤަޠަރާއި މިޞްރު ފަދަ އެހެނިހެން ދަައުލަތްތައް މެދުވެރިކޮށެވެ. 

މިވަގުތު ޙަމާސްގެ ބެލުމުގެ ދަށުގައި ދިރިތިބި 24 ރަހީނުންނާއި މަރުވެފައިވާ 34 ރަހީނެއްގެ ހަށިގަނޑު އެބައޮތްކަމަށް ބެލެވެއެވެ. އަދި ޣައްޒާގައި ޙަމާސްގެ އަތް ދަށުގައި ތިބި ރަހީނުންގެ ތެރެއިން 5 މީހަކީ އެމެރިކާގެ ރައްޔިތުކަން އޮތް މީހުންނެވެ. 

ކިޔުންތެރިންގެ ހިޔާލު