ބްރެޒިލްގެ ކުރީގެ ކެޕްޓަން، ނޭމާ، ގާތްގަނޑަކަށް 17 މަސްދުވަހުގެ މެދުކެނޑުމަކަށްފަހު އެނބުރި ގައުމީ ޓީމުގައި ހިމެނިއްޖެއެވެ.

އުމުރުން 33 އަހަރުގެ ނޭމާ، އަށް ވަނީ މި މަހު އާޖެންޓީނާ އާއި ކޮލަމްބިއާއާ ދެކޮޅަށް ކުޅެން އޮތް ވޯލްޑް ކަޕް ކޮލިފައިންގ މެޗުތަކަށް ކޯޗު، ޑޮރިވާލް ޖޫނިއާ އެކުލަވާލި ސްކޮޑުން ފުރުޞަތު ދީފައެވެ.

މިއީ 2023 ވަނަ އަހަރުގެ އޮކްޓޫބަރު މަހުގެ ތެރޭގައި ކޮލިފައިންގައި އުރުގުއޭ އަތުން 2-0 އިން ބްރެޒިލް ބަލިވި މެޗުގައި ކުރިމަތިވި ކަކުލުގެ އޭސީއެލް އަނިޔާއަށްފަހު، ނޭމާ އަށް ގައުމީ ޓީމުން ފުރުޞަތު ލިބުނު ފުރަތަމަ ފަހަރެވެ.

ކުރިން، ބާސެލޯނާ އާއި ޕީއެސްޖީ އަށް އަދި އެންމެ ފަހުން ސަޢޫދީ ޕްރޯ ލީގުގައި އަލް ހިލާލް އަށް ކުޅުނު ނޭމާ މިހާރު ކުޅެމުން އަންނަނީ ކެރިއަރު ފެށި ސަންޓޯސް އަށެވެ.

އޭނާ ވަނީ މިދިޔަ ޖަނަވަރީ މަހުގެ ތެރޭގައި އަލް ހިލާލްއާ އެކު ހަދާފައިވާ އެއްބަސްވުން އުވާލުމަށްފަހު، ހަ މަސްދުވަހުގެ އެއްބަސްވުމެއްގައި ސަންޓޯސް އަށް ބަދަލުވެފައެވެ.

ބްރެޒިލްގެ ކޯޗު، ޑޮރިވާލް ޖޫނިއާ ބުނީ، ނޭމާ ވަނީ ސަންޓޯސްއާ އެކު ދެ މެޗެއްގައި 90 މިނެޓު ފުރިހަމަކޮށްފައި ކަމަށާއި، ބައެއް މެޗުތަކުގައި މެޗު އެއްކޮށް ފުރިހަމަކޮށްފައިނުވި ނަމަވެސް އެކަށީގެންވާ މިންވަރަކަށް ކުޅެފައިވާ ކަމަށެވެ. އަދި ކޮލިފައިންގ މެޗުތަކުގެ ކުރިން، ކުރިއަށް އޮތް ދުވަސްތަކުގައި ޕާފޯމް ކުރަމުންދާގޮތް ވަރަށް ގާތުން ބަލަމުންދާނެ ކަމަށް ވެސް ޑޮރިވާލް ޖޫނިއާ ބުނެފައިވެއެވެ.

މީގެ 15 ވަރަކަށް އަހަރުކުރިން، ބްރެޒިލްގެ ގައުމީ ޓީމަށް ކުޅެން ފެށި ނޭމާ ވަނީ ބްރެޒިލަށް ކުޅުނު 110 މެޗުގައި 79 ލަނޑު ޖަހައިފައެވެ. އޭނާ އަކީ ބްރެޒިލް ޓީމަށް މިހާތަނަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ. 

މި ވަގުތު ދެކުނު އެމެރިކާގެ ކޮލިފައިންގ ގްރޫޕުގެ ފަސްވަނައިގައި އޮތް ބްރެޒިލް ކުރިއަށް އޮތް އިންޓަރނޭޝަނަލް ބްރޭކުގައި އެންމެ ފުރަތަމަ ނުކުންނާނީ މާރިޗް މަހުގެ 21 ވަނަ ދުވަހު ކޮލަމްބިއާއާ ދެކޮޅަށެވެ. އެއަށްފަހު، އޭގެ ފަސް ދުވަސް ފަހުން ރަށުން ބޭރުގައި ބައްދަލުކުރާނީ ވާދަވެރި އާޖެންޓީނާއާ އެވެ.

ބްރެޒިލްގެ ސްކޮޑު:

ގޯލްކީޕަރުން: އެލިސަން ބެކާ (ލިވަޕޫލް)، ބެންޓޯ (އަލް ނަސްރު)، އެޑަސަން މޮަރައެސް (މެންޗެސްޓަރ ސިޓީ)

ޑިފެންޑަރުން: ވެންޑާސަން (މޮނާކޯ)، ވެސްލީ، ލިއޯ އޯޓިޒް އާއި ޑަނީލޯ (ފްލަމެންގޯ)، ގެބްރިއަލް މަގާޅައެސް (އާސެނަލް)، މާކީނޯސް (ޕީއެސްޖީ)، މުރީލޯ (ނޮޓިންގހަމް ފޮރެސްޓް)، ގިލާމޭ އަރާނާ (އެތުލެޓިކޯ މިނެއިރޯ)

މިޑްފީލްޑަރުން: އަންދްރޭ (ވުލްވްސް)، ބްރޫނޯ ގިމަރޭޝް އާއި ޖޮއެލިންޓަން (ނިއުކާސަލް ޔުނައިޓެޑް)، ގެރްސަން (ފްލަމެންގޯ)، ނޭމާ (ސަންޓޯސް)

ފޯވާޑުން: އެސްޓެވާއޯ (ޕަލްމެއިރާސް)، ޖާއޯ ޕެޑްރޯ (ބްރައިޓަން)، ރަފީނިއާ (ބާސެލޯނާ)، ރޮޑްރީގޯ އާއި ވިނީޝިއުސް ޖޫނިއާ (ރެއާލް މެޑްރިޑް)، ސަވީނިއޯ (މެންޗެސްޓަރ ސިޓީ)، މަތެއުސް ކޫންޔާ (ވުލްވްސް)