ތުރުކީގެ ކުލަބު ގަލަތަސާރޭ އިން ފެނަބާޗޭގެ ކޯޗު، ހޯސޭ މޮރީނިއޯގެ މައްޗަށް ކުރާ ނަސްލީގޮތުން ތަފާތުކުރުމުގެ ތުހުމަތުތަކާ ގުޅިގެން އޭނާ އަކީ އެފަދަ ތަފާތުކުރުންތަކާ މުޅިން ދެކޮޅު މީހެއް ކަމަށް ބުނެފިއެވެ.

މޮރީނިއޯގެ މައްޗަށް ނަސްލީގޮތުން ތަފާތުކުރި ކަމަށް ތުހުމަތުކުރީ މިދިޔަ ފެބުރުއަރީ މަހު ތުރުކީ ލީގުގައި ގަލަތަސާރޭއާ 0-0 އިން ފެނަބާޗޭ އެއްވަރުވި މެޗަށް ފަހު އެވެ.

އެގޮތުން، ގަލަތަސާރޭ އިން ވަނީ، މޮރީނިއޯ އެ މެޗުގައި ނަސްލީގޮތުން ތަފާތުކުރުމުގެ ބަސްތަކެއް ބޭނުންކޮށްފައިވުމުން އޭނާގެ މައްޗަށް ޖިނާޢީ ދައުވާ އުފުލާނެ ކަމަށް ބުނެފައެވެ.

މޮރީނިއޯ ބުނީ، ގަލަތަސާރޭ އިން އޭނާ އަށް ނަސްލީގޮތުން ތަފާތުކުރިކަމުގެ ތުހުމަތުކުރަނީ އެއްވެސް ވަރަކަށް ވިސްނާފައި ނޫން ކަމަށެވެ. އެއީ، އެ މީހުންނަށް އޭނާގެ މާޒީ ނޭނގޭތީ ކަމަށެް ވެސް މޮރީނިއޯ ފާހަގަކުރިއެވެ.

"އެމީހުންނަކަށް ނޭނގޭ އަހަރެންނާ އެފްރިކާއާ އޮތް ގުޅުން. އެފްރިކާގެ މީހުންގެ އިތުރުން ކުޅުންތެރިންނާއި އެ ބައްރުގެ ހެޔޮއެދޭ ޖަމްޢިއްޔާތަކާ އޮތް ގުޅުން،" މޮރީނިއޯ ބުންޏެވެ.

މޮރީނިއޯ ބުނީ، ހުރިހާ ކަމެއް ގޯސްވެގެން މިއުޅެނީ ފެނަބާޗޭ އާއި ގަލަތަސާރޭއާ ދެމެދު ކުޅުނު 'އިސްތަންބޫލް ޑާބީ' އަށް ފަހު ކަމަށެވެ.

މޮރީނިއޯ އިތުރަށް ބުނީ، ހުރިހާ އެންމެންނަށް ވެސް އޭނާ އަކީ ކޮން ކަހަލަ މިޒާޖެއްގެ، ކޮން ސިފަތަކެއް ލިބިގެންވާ މީހެއްކަން އެނގޭނެ ކަމަށެވެ. އެކަމަކު، ގިނަ މީހުންނަށް އެނގެނީ ނުރަނގަޅު ސިފަތައް ކަމަށާއި، އެއީ އަސްލު ހަގީގަތާ އިދިކޮޅު ކަމެއް ކަމަށް ވެސް މޮރީނިއޯ ބުންޏެވެ.

ގަލަތަސާރޭ އިން މޮރީނިއޯގެ މައްޗަށް ކުރާ ތުހުމަތުތަކާ ގުޅިގެން އޭނާ ވަނީ، ބަދަލުގެ ގޮތުގައި 41 ހާސް ޕައުންޑް ހޯދުމަށް މައްސަލަ ހުށަހަޅައިފައެވެ. 

މޮރީނިއޯއާ ގުޅޭގޮތުން ގަލަތަސާރޭ އިން ކުރަމުންދާ ތުހުމަތުތަކާ ގުޅިގެން، އެފްރިކާ ބައްރަށް ނިސްބަތްވާ، ކުރީގެ ކުޅުންތެރިން ކަމަށްވާ، ޑިޑިއޭ ޑްރޮގްބާ އާއި މައިކަލް އެސިއެން ވަނީ އޭނާގެ ދިފާއުގައި ވާހަކަދައްކައިފައެވެ. މި ދެ ކުޅުންތެރިންނަކީވެސް ކުރިން، މޮރީނިއޯ އިރުޝާދު ދީފައިވާ ކުޅުންތެރިންނެވެ.