ENGLISH

04 އޭޕްރީލު 2025

Advertisement

ހަޤީޤަތާ ދުރުކަމަށް ބުނެ، އަރަބިންގެ ޣައްޒާ ޕްލޭން އެމެރިކާ، އިޒްރޭލަށް ކަމުދާކަމަކަށް ނުވި!

06 މާރިޗު 2025

|

ހަސަން އާމިރު

ފަލަސްތީނުގެ ޣައްޒާ އަލުން ބިނާކުރަން އަރަބި ޤައުމުތަކުން ހުށަހަޅާފައިވާ ޕްލޭން ހަޤީޤަތާ ދުރުކަމަށް ބުނެ، އެ ޕްލޭން ބަލައިގަންނަން އިޒްރޭލާއި އެމެރިކާ ދެކޮޅު ހަދައިފިއެވެ.

ޣައްޒާ އަލުން ބިނާކުރުމުގެ ޕްލޭނެއް އެކުލަވައިލަން އަރަބި ޤައުމުތަކުން އިސްނެގީ، ޣައްޒާ އަމިއްލަކޮށްލައި، އެތަން ތަރައްޤީ ކުރަން، އެތަނުގައި ދިރިއުޅޭ 2.4 މިލިއަނެއްހާ ފަލަސްތީނުގެ ރައްޔިތުން ބާލަން އެމެރިކާގެ ރައީސް ޑޮނަލްޑް ޓްރަމްޕް ކުއްލި ގޮތަކަށް ހުށަހެޅުއްވުމުންނެވެ.

ޓްރަމްޕްގެ އެ ޕްލޭންގައި ޣައްޒާގެ ރައްޔިތުން އަރަބި ބައެއް ޤައުމުތަކަށް ގެންދިޔުން ހިމެނެއެވެ.

މިޞްރުން އިސްވެ ހުށަހެޅި 91 ސަފުހާގެ ޕްލޭނުގައި ވަނީ ޣައްޒާގައި އިމާރާތްތަކާއި ވަޞީލަތްތައް ބިނާކުރުމުގެ އިތުރަށް ފަލަސްތީނުގެ ރައްޔިތުންގެ ހައްޤުތަކާއި ސަލާމަތީ ކަންކަން ބެލެހެއްޓުން ވަރަށް ތަފްޞީލުކޮށް ހިމަނައިފައެވެ.

ބައްދަލުވުން ފެށުމުގެ ގޮތުން ވާހަކަ ދައްކަވަމުން، މިޞްރުގެ ރައީސް ޢަބްދުލް ފައްތާޙް އަލް ސީސީ ވިދާޅުވީ ޣައްޒާ އަލުން ބިނާކުރުމާ އެކު، ފަލަސްތީނުގެ މިނިވަން ދަޢުލަތެއް ޤާއިމުކުރަންޖެހޭ ކަމަށެވެ.

މި ޕްލޭނުގެ ދަށުން، ފަލަސްތީނުގެ ސަރުކާރުގެ ދަށުން، ޣައްޒާގެ އިދާރީ ހިންގުން ވަގުތީ ގޮތުން ޙަވާލުކުރެވޭނީ ޚާއްސަ ކޮމިޓީއަކާއެވެ. އެއާ އެކު، ޙަމާސް ޖަމާޢަތުގެ ސީދާ ދައުރެއް މި ޕްލޭނުގައި ބަޔާންކޮށްފައެއް ނުވެއެވެ.

އަދި ޣައްޒާގެ ސަލާމަތީ ކަންކަން ބަލަހައްޓާނީ، އދ.ގެ ސަލާމަތީ މަޖިލީހުގެ ދަށުން ބައިނަލްއަޤުވާމީ ސުލްޙަ ބަލަހައްޓާ ފައުޖުން ކަމަށް އެ ޕްލޭނުގައި ބުނެފައިވެއެވެ.

މި ޕްލޭނަށް ގާތްގަނޑަކަށް 53 ބިލިއަން އެމެރިކާ ޑޮލަރު ޚަރަދުވާނެ ކަމަށް ބެލެވޭއިރު، އެ ފައިސާ ހޯދުމަށް، އަންނަ މަހު ބައިނަލްއަޤުވާމީ ބައްދަލުވުމެއް ބާއްވަން ވަނީ ހުށަހަޅައިފައެވެ.

ނަމަވެސް، އިޒްރޭލުގެ ޚާރިޖީ ވުޒާރާއިން ބުނީ އަރަބިން ހުށަހަޅާފައިވާ ޕްލޭނު، ޣައްޒާގައި މިހާރު އޮތް ހަޤީޤީ ޙާލަތަށް ރިޢާއަތް ކޮށްފައިނުވާ ކަމަށެވެ.

އަދި ޓްރަމްޕްގެ ޕްލޭނުގެ ދަށުން ފަލަސްތީނުގެ ރައްޔިތުންގެ އަމިއްލަ އިޚްތިޔާރުގައި ގޮތް ނިންމުމުގެ ފުރުޞަތު ލިބޭއިރު، އަރަބިންގެ ޕްލޭނުގައި އެފަދަ ފުރުޞަތެއް ނުލިބޭނެކަމަށް ވެސް އިޒްރޭލުން ބުންޏެވެ.

އެމެރިކާއިން ވެސް ވަނީ އިޒްރޭލުގެ އެ ވިސްނުމަށް ތާއީދުކޮށްފައެވެ.

ވައިޓް ހައުސްގެ ތަރުޖަމާނު ބްރަޔަން ހިޔުސް ވިދާޅުވި ގޮތުގައި، ވެއްޓިފައިވާ އިމާރާތްތަކާއި ނުގޮވާ ހުރި ބޮންތަކުގެ ތެރޭގައި ފަލަސްތީނުގެ ރައްޔިތުން ދިރިއުޅޭނެ ގޮތެއް ނުވިސްނެއެވެ.

ޙަމާސް ޖަމާޢަތް ނައްތާލުމުގެ ނަމުގައި، 7 އޮކްޓޯބަރު 2023 ގައި އިޒްރޭލުން ޣައްޒާއަށް ދޭން ފެށި ޢުދުވާނުތަކުގައި މުޅި ޣައްޒާ ވަނީ ސުންނާފަތިވެފައެވެ. އދ. އިން ލަފާކުރާ ގޮތުގައި ޣައްޒާގެ 90 ޕަސެންޓު ގެތަކަށް ވަނީ އިޒްރޭލުގެ ޙަމަލާތަކުގައި ގެއްލުން ލިބިފައެވެ.

އަދި ހޮސްޕިޓަލުތަކާއި އިންޖީނުގެތަކާއި ނަރުދަމާ ނިޒާމުތަކަށް ވެސް ބޮޑެތި ގެއްލުންތައް ލިބި، އަސާސީ ޚިދުމަތްތަކަށް ބުރޫއަރާފައިވާ ކަމަށް ވެސް އދ. އިން ބުނެއެވެ.

ކިޔުންތެރިންގެ ހިޔާލު