ފަލަސްތީނުގެ ޣައްޒާ އަލުން ބިނާކުރަން މިޞްރުން އިސްވެ ހުށަހެޅި 53 ބިލިއަން އެމެރިކާ ޑޮލަރުގެ ޕްލޭނަށް އަރަބި ޤައުމުތަކުގެ ލީޑަރުން އެއްބަސްވެއްޖެއެވެ.

"މިޞްރުގެ ޕްލޭނަކީ މިހާރު އަރަބި ޕްލޭނެއް،" މިޞްރުގެ ވެރިރަށް ޤާހިރާގައި އަރަބި ލީޑަރުންގެ ބައްދަލުވުމަށްފަހު އަރަބް ލީގުގެ ސެކްރެޓަރީ ޖެނެރަލް އަޙްމަދު އަބޫލް ޣައިތު ވިދާޅުވިއެވެ.

ޣައްޒާ އަލުން ބިނާކުރުމުގެ ޕްލޭނެއް އެކުލަވައިލަން އަރަބި ޤައުމުތަކުން އިސްނެގީ، ޣައްޒާ އަމިއްލަކޮށްލައި، އެތަން ތަރައްޤީ ކުރަން، އެތަނުގައި ދިރިއުޅޭ 2.4 މިލިއަނެއްހާ ފަލަސްތީނުގެ ރައްޔިތުން ބާލަން އެމެރިކާ ރައީސް ޑޮނަލްޑް ޓްރަމްޕް ކުއްލި ގޮތަކަށް ހުށަހެޅުއްވުމުންނެވެ.

ޓްރަމްޕްގެ އެ ޕްލޭންގައި ޣައްޒާގެ ރައްޔިތުން އަރަބި ބައެއް ޤައުމުތަކަށް ގެންދިޔުން ހިމެނެއެވެ.

ނަމަވެސް، އަރަބި ޤައުމުތަކުން ވަނީ ޓްރަމްޕްގެ އެ ޕްލޭނަށް ނޫނެކޭ ބުނެފައެވެ. އަދި ޣައްޒާގެ ރައްޔިތުން އަމިއްލަ ވަޒަނުން ބޭރުކުރާ އެއްވެސް ޕްލޭނަކަށް ތާއީދުނުކުރާނެ ކަމަށް ވެސް އެ ޤައުމުތަކުން ވަނީ ބުނެފައެވެ.

ޓްރަމްޕްގެ ޕްލޭނަށް ނޫސީދާކޮށް އިޝާރާތް ކުރައްވައި، ޣައިތު ވެސް ވިދާޅުވީ، ފަލަސްތީނުގެ ރައްޔިތުން އަމިއްލައަށް ބޭނުންވެގެންވިޔަސް އަދި ގަދަބާރުން ވިޔަސް، އެ މީހުންގެ ވަޒަނުން ބޭރުކުރުމާ އަރަބި ޤައުމުތަކުން ސީދާ ދެކޮޅު ކަމަށެވެ.

މިޞްރުން އިސްވެ ހުށަހެޅި 91 ސަފުހާގެ ޕްލޭނުގައި ވަނީ ޣައްޒާގައި އިމާރާތްތަކާއި ވަޞީލަތްތައް ބިނާކުރުމުގެ އިތުރަށް ފަލަސްތީނުގެ ރައްޔިތުންގެ ހައްޤުތަކާއި ސަލާމަތީ ކަންކަން ބެލެހެއްޓުން ވަރަށް ތަފްޞީލުކޮށް ހިމަނައިފައެވެ.

ބައްދަލުވުން ފެށުމުގެ ގޮތުން ވާހަކަ ދައްކަވަމުން، މިޞްރުގެ ރައީސް ޢަބްދުލް ފައްތާޙް އަލް ސީސީ ވިދާޅުވީ ޣައްޒާ އަލުން ބިނާކުރުމާ އެކު، ފަލަސްތީނުގެ މިނިވަން ދަޢުލަތެއް ޤާއިމުކުރަންޖެހޭ ކަމަށެވެ.

މި ޕްލޭނުގެ ދަށުން، ފަލަސްތީނުގެ ސަރުކާރުގެ ދަށުން، ޣައްޒާގެ އިދާރީ ހިންގުން ވަގުތީ ގޮތުން ޙަވާލުކުރެވޭނީ ޙާއްސަ ކޮމިޓީއަކާއެވެ. އެއާ އެކު، ޙަމާސް ޖަމާޢަތުގެ ސީދާ ދައުރެއް މި ޕްލޭނުގައި ބަޔާންކޮށްފައެއް ނުވެއެވެ.

އަދި ޣައްޒާގެ ސަލާމަތީ ކަންކަން ބަލަހައްޓާނީ، އދ.ގެ ސަލާމަތީ މަޖިލީހުގެ ދަށުން ބައިނަލްއަޤުވާމީ ސުލްޙަ ބަލަހައްޓާ ފައުޖުން ކަމަށް އެ ޕްލޭނުގައި ބުނެފައިވެއެވެ.

މި ޕްލޭނަށް ބޭނުންވާ ފައިސާ ހޯދުމަށް، އަންނަ މަހު ބައިނަލްއަޤުވާމީ ބައްދަލުވުމެއް ބާއްވަން ވަނީ ހުށަހަޅައިފައެވެ. އެކި މަސްދަރުތަކުން ބުނެފައިވާ ގޮތުގައި، މި ޕްލޭނަށް ބޭނުންވާ ފައިސާގެ ބޮޑު ބައެއް ދޭން މުއްސަނދި އަރަބި ޤައުމުތަކުން ތިބީ ތައްޔާރަށެވެ.

ނަމަވެސް، އޭގެކުރިން، އަލުން ހަނގުރާމަ ފެށި، އަލަށް ބިނާކުރެވޭ އިމާރާތްތައް ސުންނާފަތިވެދާނެކަމުގެ ކަންބޮޑުވުން އޮތް ކަމަށް މަޢުލޫމާތު ލިބިފައިވެއެވެ.

ޙަމާސް ޖަމާޢަތް ނައްތާލުމުގެ ނަމުގައި، 7 އޮކްޓޯބަރު 2023 ގައި އިޒްރޭލުން ޣައްޒާއަށް ދޭން ފެށި ޢުދުވާނުތަކުގައި މުޅި ޣައްޒާ ވަނީ ސުންނާފަތިވެފައެވެ. އދ. އިން ލަފާކުރާ ގޮތުގައި ޣައްޒާގެ 90 ޕަސެންޓު ގެތަކަށް ވަނީ އިޒްރޭލުގެ ޙަމަލާތަކުގައި ގެއްލުން ލިބިފައެވެ.

އަދި ހޮސްޕިޓަލުތަކާއި އިންޖީނު ގެތަކާއި ނަރުދަމާ ނިޒާމުތަކަށް ވެސް ބޮޑެތި ގެއްލުންތައް ލިބި، އަސާސީ ޚިދުމަތްތަކަށް ބުރޫއަރާފައިވާ ކަމަށް ވެސް އދ.އިން ބުނެއެވެ.