އައިސީސީ ޗެމްޕިއަންސް ޓްރޮފީގެ ސެމީ ފައިނަލުގައި އޮސްޓްރޭލިއާ ހަތަރު ވިކެޓުން ބަލިކޮށް، އިންޑިއާ އެ މުބާރާތުގެ ފައިނަލަށް މިއަދު ދަތުރުކޮށްފިއެވެ.

މިއީ އެ މުބާރާތުގެ ފައިނަލުގައި އިންޑިއާ އިން ޖެހިޖެހިގެން ކުޅޭނެ ތިންވަނަ ފަހަރެވެ. އަދި، މިއީ އޮސްޓްރޭލިއާ އާ ދެކޮޅަށް އެންމެ ފަހުން ކުޅުނު ނޮކްއައުޓް ހަތަރު މެޗުގެ ތެރެއިން އިންޑިއާގެ ފުރަތަމަ މޮޅު ވެސް މެއެވެ.

ދުބާއީ އިންޓަރނޭޝަނަލް ކްރިކެޓް ސްޓޭޑިއަމްގައި ކުޅުނު މެޗުގެ ޓޮސް ދިމާވުމުން އޮސްޓްރޭލިއާ އިން ކުޅެން އަރައި، 49.3 އޯވަރުގެ ތެރޭގައި ހުރިހާ ކުޅުންތެރިން ނުބައިވީ 264 ލަނޑަށެވެ.

އޮސްޓްރޭލިއާގެ އިނިންގސްގައި އެންމެ ރަނގަޅަށް ކުޅުނީ ކެޕްޓަން، ސްޓިވެން ސްމިތު އެވެ. ސްމިތު ވަނީ 73 ލަނޑު ހަދައިފައެވެ. އިންޑިއާ އިން އެންމެ ރަނގަޅަށް އުކީ ތިން ވިކެޓް ނެގި މުޙައްމަދު ޝަމީ އެވެ.

ރައްދުގައި އިންޑިއާ އިން ކުޅެން އަރައި، ބާކީ 11 ބޯޅަ އޮއްވާ، މޮޅުވެގެން ފޭބީ ހަ ވިކެޓަށް 267 ލަނޑު ހަދައިގެންނެވެ. މި މެޗުން އިންޑިއާ މޮޅުކޮށްދިނުމުގައި މުހިއްމު ދައުރެއް އަދާކުރީ، ވިރާތު ކޯލީ އެވެ. ކޯލީ ވަނީ 84 ލަނޑުހަދައިފައެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެސް ކޯލީ އެވެ.

މުބާރާތުގެ ދެވަނަ ސެމީގައި މާދަމާ ނިއު ޒީލަންޑް ނުކުންނާނީ ދެކުނު އެފްރިކާއާ ދެކޮޅަށެވެ. މި މެޗު ފަށާނީ ރާއްޖޭގަޑިން މެންދުރު 2 ޖަހާއިރު އެވެ.