ރަޝިޔާއާ ދެކޮޅަށް ޔޫކްރޭނުން ކުރަމުންދާ ހަނގުރާމައިގައި، އެމެރިކާއިން ޔޫކްރޭނަށް ފޯރުކޮށްދެމުންދާ އަސްކަރީ އެހީ މި ވަގުތަށް މަޑުޖައްސައިލަން ރައީސް ޑޮނަލްޑް ޓްރަމްޕް ނިންމަވާފައިވާ ކަމަށް ވައިޓް ހައުސްގެ އޮފިޝަލަކާ ޙަވާލާދީ ބައެއް ނޫސްތަކުން ބުނެފިއެވެ.

މި ނިންމުން އައިސްފައިވަނީ، ޓްރަމްޕާއި ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ވައިޓް ހައުސްގައި ބޭއްވި ބައްދަލުވުން ދެ ރައީސުންގެ މެދުގައި ބޮޑު އަރައިރުމަކަށް ބަދަލުވެ، ދެ ރައީސުންގެ މެދުގައި ބަހުގެ ހޫނު ޙަމަލާތަކެއް ބަދަލުކޮށްފައިވާ ދަނޑިވަޅެއްގައެވެ.

ވައިޓް ހައުސްގެ އޯވަލް އޮފީހުގެ ބައްދަލުވުން ހޫނުވީ، ރަޝިޔާގެ ރައީސް ވްލެޑެމިޔަރ ޕޫޓިންއާ އެކު މަޝްވަރާ އިސްކޮށް، ސުލްޙަވެރި ޙައްލެއް ގެންނަން ޒެލެންސްކީއަށް ބާރު އަޅަން ފެށުމުންނެވެ.

"ރައީސް [ޓްރަމްޕް] ވަރަށް ސާފުކޮށް ވިދާޅުވި، އެ މަނިކުފާނުގެ ބޭނުންފުޅުވަނީ ސުލްޙަ ޤާއިމުކުރަން ކަން. އެހެންކަމުން، އަޅުގަނޑުމެންގެ ޕާޓްނަރުންވެސް ޖެހޭ، އެ މިސްރާބަށް މަސައްކަތް ކުރަން،" ނަން ނުޖަހަން އެދިވަޑައިގެން އެ އޮފިޝަލް ވިދާޅުވިއެވެ.

"އަޅުގަނޑުމެން އެހީ ދިނުން މި މަޑުޖައްސާލަނީ، ދޭން އެހީއިން ހައްލަކަށް ޙިއްސާ ކުރޭތޯ ބަލައި، މުރާޖަޢާ ކުރުމަށް."

ޓްރަމްޕްގެ މި ނިންމެވުމާ އެކު، އެމެރިކާއިން ބޭނުންވާ ގޮތަށް ރަޝިޔާ އާ އެކު ސުލްޙައިގެ އެއްބަސްވުމަކަށް ދާން ޔޫކްރޭނަށް ޕްރެޝަރު ވަނީ އިތުރަށް ބޮޑުވެފައެވެ.

އެމެރިކާގެ އެހީ ނުލިބޭނަމަ، ރަޝިޔާއާ ދެކޮޅަށް ޔޫކްރޭނު ސިފައިންނަށް މާ ގިނަ ދުވަހު ހިފަހައްޓައި ނުލެވޭނެ ކަމަށް ޒެލެންސްކީ ވެސް ވަނީ މީގެކުރިން ވިދާޅުވެފައެވެ.