އިނގިރޭސި އެފްއޭ ކަޕްގެ ފަސްވަނަ ބުރުގައި ރޭ ކުޅުނު މެޗުގައި ޕެނަލްޓީ ޖަހައިގެން 5-4 އިން އިޕްސްވިޗް ޓައުން ބަލިކޮށް، ނޮޓިންގހަމް ފޮރެސްޓް އެ މުބާރާތުގެ ކުއާޓާ ފައިނަލުން ޖާގަ ހޯދައިފިއެވެ.

މިއީ މިދިޔަ ހަތަރު ސީޒަނުގެ ތެރޭގައި ފޮރެސްޓުން އެފްއޭ ކަޕްގެ ކުއާޓާ އަށް ދަތުރުކުރި ދެވަނަ ފަހަރެވެ.

ފޮރެސްޓްގެ ދަނޑުގައި ކުޅުނު މެޗުގެ ފުރިހަމަ ވަގުތު ހަމަވިއިރު ދެ ޓީމު 1-1 އިން އެއްވަރުވުމާއެކު، ދެން ކުޅުނު އިތުރު ވަގުތުގެ 15 މިނެޓުގެ ދެ ހާފުގެ ކުޅުމަށްފަހު ވެސް ނަތީޖާ ބަދަލުނުވުމުން ދެން ޖެހުނީ ޕެނަލްޓީ ޖަހާށެވެ.

ރޭގެ މެޗުގައި އިޕްސްވިޗުގެ ޖޯޖް ހާސްޓްގެ ގޯލުން އެ ޓީމު ލީޑު ނަގާފައިވަނިކޮށް، ފޮރެސްޓަށް އެއްވަރުކޮށްދިނީ ރަޔާން ޔޭޓްސް އެވެ. އޭގެފަހުން، ފޮރެސްޓްގެ ކެލުމް ހަޑްސަން-އޮޑޯއީ ފޮނުވާލި ބޯޅައެއް ގޯލްގެ ހުރަސްދަނޑިއަށް އަމާޒުވެފައިވެއެވެ.

ޕެނަލްޓީ ޝޫޓްއައުޓްގައި ދެ ޓީމު ހިމެނޭ ގޮތަށް ފޮނުވާލި ނުވަ ޕެނަލްޓީ ކާމިޔާބުކުރިއިރު، އިޕްސްވިޗުން ފޮނުވާލި ފަސްވަނަ ޕެނަލްޓީ ފޮރެސްޓްގެ ގޯލްކީޕަރު، މެޓްޒް ސެލްސް ވަނީ މަތަކޮށްފައެވެ.

މުބާރާތުގެ ކުއާޓާ ފައިނަލުގައި ފޮރެސްޓް ނުކުންނާނީ ބްރައިޓަންއާ ދެކޮޅަށެވެ.