ޔޫކްރޭނުގެ އަގުބޮޑު މައުދަނުތަކުން ނަފާ ހޯދުމުގެ އެއްބަސްވުމުގައި އެމެރިކާއާ އެކު ސޮއިކުރަން ތައްޔާރަށް ހުންނެވި ކަމަށް ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ވިދާޅުވެއްޖެއެވެ.

"ދެ ފަރާތުން ވެސް އެއްބަސްވާނަމަ، މިހާރު ހުށަހަޅާފައިވާ އެއްބަސްވުމުގައި ސޮއިކުރަން ތައްޔާރު،" ރަޝިޔާއާ ދެކޮޅަށް ހަނގުރާމަ ނިންމުމާ ގުޅޭގޮތުން އިނގިރޭސިވިލާތުގައި ބޭއްވުނު ސަމިޓަށްފަހު ޒެލެންސްކީ ނޫސްވެރިންނަށް ވިދާޅުވިއެވެ.

އެއީ އެމެރިކާއިން ފޯރުކޮށްދީފައިވާ އަސްކަރީ އެހީގެ އަގު އަދާކުރަން، ޔޫކްރޭނުގެ އަގުބޮޑު މައުދަނުތަކުން ދެ ޤައުމު ގުޅިގެން ނަފާ ހޯދުމަށް ސޮއިކުރަން އުޅުނު އެއްބަސްވުމެކެވެ.

މައުދަނުތަކުގެ އެއްބަސްވުމުގައި ސޮއިކުރުމަށް ހަމަޖެހިފައި އޮތީ، މިދިޔަ ހުކުރު ދުވަހު ޒެލެންސްކީ އެމެރިކާއަށް ކުރެއްވި ދަތުރުފުޅުގެ ތެރެއިންނެވެ.

ނަމަވެސް، އެ އެއްބަސްވުމުގައި ސޮއިކުރުމުގެ ކުރިން، އެމެރިކާގެ ރައީސް ޑޮނަލްޑް ޓްރަމްޕާއި ޒެލެންސްކީ ވައިޓް ހައުސްގައި ބޭއްވި ބައްދަލުވުން ދެ ރައީސުންގެ މެދުގައި ބޮޑު އަރައިރުމަކަށް ބަދަލުވެ، ބައްދަލުވުން ވެސް ކުރުކޮށްލީއެވެ.

ވައިޓް ހައުސްގެ އޯވަލް އޮފީހުގެ ބައްދަލުވުން ހޫނުވީ، ރަޝިޔާގެ ރައީސް ވްލެޑެމިޔަރ ޕޫޓިންއާ އެކު މަޝްވަރާ އިސްކޮށް، ސުލްޙަވެރި ޙައްލެއް ގެންނަން ޒެލެންސްކީއަށް ބާރު އަޅަން ފެށުމުންނެވެ.

އެއާ އެކު ދެ ރައީސުންގެ މެދުގައި ބަހުގެ ހޫނު ޙަމަލާތަކެއް ވެސް ބަދަލުކުރެވުނެވެ.

ޓްރަމްޕް ވިދާޅުވި ގޮތުގައި، އެމެރިކާއިން ދެމުންދާ އެހީތެރިކަމަށް ޔޫކްރޭނު މިހާރަށް ވުރެ ބޮޑަށް "ޝުކުރުވެރި" ވާންޖެހެއެވެ.

އަދި ޔޫކްރޭނު މިހާރު އޮތީ "އަމިއްލަ ޝަރުތުތަކެއް އިސްކުރެވޭ ޙާލަތެއްގައި ނޫން" ކަމަށް ވެސް ޓްރަމްޕް ވިދާޅުވިއެވެ.

އެއާއެކު ޓްރަމްޕް ވަނީ ޔޫކްރޭނުން އެއްބަސްވުމަކަށް ނާދެވޭ ނަމަ، އެމެރިކާއިން އެހީ ފޯރުކޮށްދިނުން ހުއްޓައިލުމުގެ އިންޒާރު ވެސް ދެއްވައިފައެވެ.

ބަހުގެ މި ޙަމަލާތައް ބަދަލުކުރެވެމުންދިޔައީ ނޫސްވެރިންގެ ވެސް ކުރިމަތީގައެވެ.