ފަލަސްތީނުގެ ޣައްޒާގައި ޙަމަލާތައް ހުއްޓައިލުމަށް މިހާރު ޢަމަލުކުރަމުންދާ އެއްބަސްވުމުގެ ދެވަނަ ފިޔަވަހި ފަށާނެކަމަށް އިޒްރޭލުން ވެފައިވާ ވަޢުދާ ޚިލާފުވެ، ޣައްޒާއަށް އެހީ ވެއްދުމުގެ މަގުތައް ބަންދުކޮށްފިއެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް އަދި ނުލިބިއެވެ.

އެކަން އެހެން އޮއްވައި، އިޒްރޭލުން މިއަދު ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ.

މިއީ، އެމެރިކާގެ ރައީސް ޑޮނަލްޑް ޓްރަމްޕްގެ މެދުއިރުމަތީގެ މަންދޫބު ސްޓީވް ވިޓްކޯފް އިސްވެ ހުށަހަޅުއްވާފައިވާ ހުށަހެޅުއްވުމެކެވެ.

މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.

ނަމަވެސް، އެކަމަށް އެއްބަސްނުވާނެކަމަށް ޙަމާސްއިން ވަނީ ބުނެފައެވެ. ޙަމާސްއިން ބޭނުންވަނީ، ދެވަނަ މަރުޙަލާ އަވަހަށް ފަށައި، ޣައްޒާގެ ޢުދުވާނުތައް ދާއިމީކޮށް ހުއްޓައިލުމުގެ އެއްބަސްވުމަކަށް ދިޔުމަށެވެ.

ޙަމާސްއިން ނޫނެކޭ ބުނުމާއެކު، އިޒްރޭލުން މިހާރު ވަނީ އެ ޖަމާޢަތަށް ބިރު ދައްކަން ފަށައިފައެވެ. މިގޮތުން، އެ ހުށަހެޅުމަށް އެއްބަސްކުރުވަން، ޣައްޒާއަށް އެހީ ވެއްދުމުގެ މަގުތައް ވަގުތީ ގޮތުން ބަންދުކޮށްފައިވާ ކަމަށް އިޒްރޭލުން ވަނީ އިޢުލާނުކޮށްފައެވެ.

އަދި ޣައްޒާގެ ޢުދުވާނުތައް އަލުން ފަށާނެ ކަމުގެ އިންޒާރު ވެސް އިޒްރޭލުން ވަނީ ދީފައެވެ.