ޖަރުމަން ލީގުގައި ރޭ ކުޅުނު މެޗުގައި ފަހަތުން އަރައި ސްޓުޓްގާޓް 3-1 އިން ބަލިކޮށް، ބަޔާން މިއުނިކު ތާވަލްގެ ކުރީގައި 11 ޕޮއިންޓުގެ ލީޑެއް ނަގައިފިއެވެ.

މި މޮޅާއެކު، ބަޔާން އެއްވަނައިގައި އޮތީ 24 މެޗުން 61 ޕޮއިންޓް ހަމަކޮށްގެންނެވެ. ދެވަނައިގައި އޮތް ބަޔާ ލެވަކޫސަން އަށް، އެއް މެޗު މަދުން ކުޅެގެން ލިބިފައިވަނީ 50 ޕޮއިންޓެވެ. އެއިންޓްރަކްޓް ފްރެންކްފާޓަށް ލިބިފައިވަނީ 42 ޕޮއިންޓެވެ.

ސްޓުޓްގާޓްގެ ދަނޑުގައި ކުޅުނު މެޗުގައި އެ ޓީމު ލީޑު ނެގީ އެންޖެލޯ ސްޓިލާ އެވެ. ފުރަތަމަ ހާފު ނިމުމުގެކުރީން، ބަޔާން އަށް އެއްވަރުކޮށްދިނީ މައިކަލް އޮލީސޭ އެވެ.

ދެވަނަ ހާފުގައި ބަޔާންގެ އަނެއް ދެ ލަނޑު ޖަހައިދިނި ލެއޮން ގޮރެޓްޒްކާ އާއި ކިންގްސްލީ ކޯމަން އެވެ.

މި މެޗުން ބަލިވި ސްޓުޓްގާޓް އޮތީ ތާވަލްގެ ހަތްވަނައިގައެވެ. އެ ޓީމަށް ލިބިފައިވަނީ 36 ޕޮއިންޓެވެ.