ENGLISH
04 އޭޕްރީލު 2025
ރަޝިޔާ ހަނގުރާމަ ނިންމުމުގެ ބައްދަލުވުން ބަދަލުވީ ޓްރަމްޕާއި ޒެލެންސްކީގެ ބޮޑު އަރައިރުމަކަށް
01 މާރިޗު 2025
|
އެމެރިކާގެ ރައީސް ޓްރަމްޕާއި ޔުކްރޭނުގެ ރައީސް ޒެލެންސްކީގެ ބައްދަލުވުމުގެ ތެރެއިން
އެންމެ މަޤްބޫލު
ރަޝިޔާ އާ ދެކޮޅަށް ޔޫކްރޭނުން ކުރަމުންދާ ހަނގުރާމަ ނިމުމަކަށް ގެނައުމުގައި އެމެރިކާގެ ރައީސް ޑޮނަލްޑް ޓްރަމްޕާއި ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ކުރެއްވި މަޝްވަރާތައް ބޮޑު އަރައިރުމަކަށް ބަދަލުވެ، ޔޫކްރޭނުގެ މުސްތަޤުބަލު އިތުރު ނުތަނަވަސްކަމެއްގެ ތެރެއަށް ވެއްޓިއްޖެއެވެ.
ޒެލެންސްކީ އެމެރިކާއަށް ވަޑައިގެން، ވައިޓް ހައުސްގެ އޯވަލް އޮފީހުގެ ބައްދަލުވުން ހޫނުވީ، ރަޝިޔާގެ ރައީސް ވްލެޑެމިޔަރ ޕޫޓިން އާ އެކު މަޝްވަރާ އިސްކޮށް، ސުލްޙަވެރި ޙައްލެއް ގެންނަން ޒެލެންސްކީއަށް ބާރު އަޅަން ފެށުމުންނެވެ.
އެއާ އެކު ދެ ރައީސުންގެ މެދުގައި ބަހުގެ ހޫނު ޙަމަލާތަކެއް ވެސް ބަދަލުކުރެވުނެވެ.
ޓްރަމްޕް ވިދާޅުވި ގޮތުގައި، އެމެރިކާއިން ދެމުންދާ އެހީތެރިކަމަށް ޔޫކްރޭނު މިހާރަށް ވުރެ ބޮޑަށް "ޝުކުރުވެރި" ވާންޖެހެއެވެ.
އަދި ޔޫކްރޭނު މިހާރު އޮތީ "އަމިއްލަ ޝަރުތުތަކެއް އިސްކުރެވޭ ޙާލަތެއްގައި ނޫން" ކަމަށް ވެސް ޓްރަމްޕް ވިދާޅުވިއެވެ.
އެއާއެކު ޓްރަމްޕް ވަނީ ޔޫކްރޭނުން އެއްބަސްވުމަކަށް ނާދެވޭ ނަމަ، އެމެރިކާއިން އެހީ ފޯރުކޮށްދިނުން ހުއްޓައިލުމުގެ އިންޒާރު ވެސް ދެއްވައިފައެވެ.
އެމެރިކާގެ ނައިބު ރައީސް ޖޭޑީ ވާންސް ވެސް ބައިވެރިވެވަޑައިގެންނެވި ބައްދަލުވުމުގައި، އޭނާ ވެސް ވަނީ ޒެލެންސްކީ އާ ޖަދަލު ކުރައްވައި، އެމެރިކާއަށް އިޙްތިރާމް ކުޑަކުރާ ކަމުގެ ތުހުމަތު ޒެލެންސްކީއަށް ކުރައްވައިފައެވެ.
ބަހުގެ މި ޙަމަލާތައް ބަދަލުކުރެވެމުންދިޔައީ ނޫސްވެރިންގެ ވެސް ކުރިމަތީގައެވެ.
ޒެލެންސްކީ އެއްޗެއް ވިދާޅުވާން މަސައްކަތް ކުރެއްވި ނަމަވެސް، އެ ފުރުޞަތު ދެއްވައިފައެއް ނުވެއެވެ.
އެމެރިކާގެ އޮފިޝަލުންނާ ޙަވާލާދީ ބައެއް މީޑިޔާތަކުން ރިޕޯޓުކޮށްފައިވާ ގޮތުގައި، އެ ބައްދަލުވުން ކުރުކޮށްލައްވައި، ޒެލެންސްކީ ވައިޓް ހައުސް ދޫކުރައްވައި ވަޑައިގަތުމަށް އެންގެވިއެވެ.
މި ބައްދަލުވުމަށްފަހު، ޔޫކްރޭނުގެ އަގުބޮޑު މައުދަނުތަކުން އެމެރިކާއާ ގުޅިގެން ނަފާ ހޯދުމުގެ އެއްބަސްވުމެއްގައި ސޮއިކުރުމަށްވެސް އޮތީ ހަމަޖެހިފައެވެ.
ނަމަވެސް، އެފަދަ އެއްބަސްވުމަކަށް ދިޔުމަށް ޓްރަމްޕްގެ ޝައުޤުވެރިކަމެއް ނެތް ކަމަށް އޮފިޝަލުންނާ ޙަވާލާދީ ބައެއް ނޫސްތަކުން ބުންޏެވެ.
އެއީ އެމެރިކާއިން ފޯރުކޮށްދީފައިވާ އަސްކަރީ އެހީގެ އަގު އަދާކުރަން، ޔޫކްރޭނުގެ އަގުބޮޑު މައުދަނުތަކުން ދެ ޤައުމު ގުޅިގެން ނަފާ ހޯދުމަށް ސޮއިކުރަން އުޅުނު އެއްބަސްވުމެކެވެ.
ޒެލެންސްކީ އާ މެދު ޓްރަމްޕް ޢަމަލުކުރެއްވީ ވަރަށް އިހާނެތިކޮށް ކަމަށް ޔޫރަޕުގެ ޤައުމުތަކުގެ ވެރިން ވަނީ ސިފަކުރައްވައި، ކަންބޮޑުވުން ފާޅުކުރައްވައިފައެވެ.
ނަމަވެސް، ރަޝިޔާގެ ބައެއް އިސް ވެރިން ވަނީ ޓްރަމްޕް، ޒެލެންސްކީ "ސައިޒު"ކޮށްލެއްވި ކަމަށް ބުނެ، ޓްރަމްޕަށް ތަޢުރީފް ކުރައްވަމުންނެވެ.
މި ބައްދަލުވުމުގެ ތެރެއިން ޓްރަމްޕާއެކު އަރައިރުމަކަށް ދިޔަ ނަމަވެސް، ގުޅުން އަދިވެސް އިއާދަކުރެވޭނެކަމަށް ޔަޤީންކުރައްވާ ކަމަށް އެމެރިކާގެ ނޫހަކަށް ދެއްވި އިންޓަވިއުއެއްގައި ޒެލެންސްކީ ވަނީ ވިދާޅުވެފައެވެ.