ރެއާލް މެޑްރިޑްގެ ގޯލްކީޕަރު، ތިބައު ކޯޓުއާ އެނބުރި ބެލްޖިއަމް ގައުމީ ޓީމާ ގުޅޭނެ ކަމަށް އެ ޓީމުގެ ކޯޗު، ރުޑީ ގާސިއާ ބުނެފިއެވެ.

މި މަހުގެ ކުރީކޮޅު ބެލްޖިއަމްގެ ކޯޗުގެ މަގާމަށް ހަމަޖެއްސީ ގާސިއާ ބުނީ، އަންނަ މާރިޗް މަހުގެ ތެރޭގައި އެ ގައުމުން ކުޅުމަށް ހަމަޖެހިފައިވާ މެޗުތަކަށް ނަގާ ސްކޮޑުގައި ކޯޓުއާ ހިމަނާނެ ކަމަށެވެ.

އުމުރުން 32 އަހަރުގެ ކޯޓުއާ ވަނީ، މިދިޔަ އަހަރުގެ ޔޫރޯ ފުޓްބޯޅަ މުބާރާތް އޮތް ދުވަސްވަރު އޭރުގެ ކޯޗު، ޑޮމެނިކޯ ޓެޑެސްކޯއާ ޖެހުނު މައްސަލައަކާ ގުޅިގެން އެ ކޯޗު ހުއްޓާ ދެން އޭނާ ގައުމީ ޓީމަށް ނުކުޅޭނެ ކަމަށް ބުނެފައެވެ.

އެހެންކަމުން، މި ފެބުރުއަރީ މަހުގެ ކުރީކޮޅު، ޓެޑެސްކޯ މަގާމުން ވަކިކުރުމާއެކު ކޯޓުއާ ވަނީ އައު ކޯޗު، ގާސިއާގެ އިރުޝާދުގެ ދަށުން ގައުމީ ޓީމަށް ކުޅެން ތައްޔާރަށް ހުރި ކަމުގެ އިޝާރާތެއްދީ، ކޯޗާ މަޝްވަރާ ކުރަން ބޭނުންވާ ކަމަށެވެ.

މި ވަގުތު ދުނިޔޭގެ އެންމެ މޮޅު ގޯލްކީޕަރުންގެ ތެރޭގައި ހިމެނޭ، ކޯޓުއާގެ އިތުރުން މެންޗެސްޓަރ ސިޓީގެ ކެވިން ޑި ބްރޭނާ އާއި ޖެރެމީ ޑޮކޫ އަދި އެތުލެޓިކޯ މެޑްރިޑްގެ އެކްސެލް ވިޓްސެލްއާ ވެސް ބައްދަލުކޮށްފައިވާ ކަމަށް ކޯޗު، ގާސިއާ ވަނީ ބުނެފައެވެ. 

ދެހާސް އެގާރަ ވަނަ އަހަރު ބެލްޖިއަމް ޤައުމީ ޓީމަށް ކުޅެން ފެށި ކޯޓުއާ ވަނީ މިހާތަނަށް 102 މެޗު ކުޅެދީ، އޭގެތެރެއިން 51 މެޗުގައި ބައިކޮޅަށް ލަނޑެއް ވަނަނުދީ ނިންމާލައިފައެވެ. އޭނާ އެންމެ ފަހުން ޤައުމީ ޓީމަށް މެޗެއް ކުޅުނީ 2023 ވަނަ އަހަރުގެ ޖޫން މަހުއެވެ.

މިދިޔަ ދޮޅު އަހަރެއްހާ ދުވަހުގެ ތެރޭގައި، ކޯޓުއާ ނެތި ބެލްޖިއަމްގެ ޤައުމީ ޓީމުގެ އެއްވަނަ ކީޕަރުގެ މަގާމު ފުރަމުން އައިސްފައިވަނީ ސަޢޫދީ ޕްރޯ ލީގުގައި ކުޅެމުން އަންނަ ކީޕަރު، ކޮއެން ކަސްޓީލްސް އެވެ.   

ބެލްޖިއަމަށް ދެން އެންމެ އަވަހަށް އޮތީ އަންނަ މާރިޗް މަހުގެ 20 އާއި 23 ވަނަ ދުވަހު ޔޫކްރޭނާ ދެކޮޅަށް ޔުއެފާ ނޭޝަންސް ލީގުގައި ކުޅެން ހަމަޖެހިފައިވާ ދެ މެޗެވެ.