އަޚުލާޤީ މައްސަލަތަކަކާ ގުޅިގެން މަގާމުން ވަކިކޮށްފައިވާ ޕްރިމިއަރ ލީގުގެ ރެފްރީ، ޑޭވިޑް ކޫޓް، ޔުއެފާ އިން ސަސްޕެންޑްކޮށްފިއެވެ.

އުމުރުން 42 އަހަރުގެ ކޫޓްގެ މައްޗަށް ތުހުމަތުކުރެވުނު އަޚުލާޤީ މައްސަލަތަކާ ގުޅިގެން މިދިޔަ ޑިސެމްބަރު މަހުގެ ތެރޭގައި އިނގިރޭސިވިލާތުގެ ރެފްރީންގެ މައި ޖަމްޢިއްޔާ، ޕްރޮފެޝަނަލް ގޭމް މެޗް އޮފިޝަލްސް ލިމިޓެޑް (ޕީޖީއެމްއޯއެލް) އިން ވަނީ މަގާމުން އޭނާ ވަކިކޮށްފައެވެ. 

ކޫޓްގެ މައްޗަށް ތަހުގީގު ހިންގަން ފަށައި، އެންމެ ފުރަތަމަ މަގާމުން ސަސްޕެންޑްކުރުމަށް ފަހު އޭގެފަހުން މަގާމުން ވަކިކުރީ، ލިވަޕޫލްގެ ކުރީގެ ކޯޗު، ޔާގެން ކްލޮޕްއާ ބެހޭ ގޮތުން ނޭދެވޭ ގޮތަކަށް ވާހަކަ ދައްކާ ކަމަށް ބުނެވޭ ވީޑިއޯއެއް ސޯޝަލް މީޑިއާގައި ދައުރުވުމާ ގުޅިގެންނެވެ.

އަދި، އޭގެފަހުން މިދިޔަ ޔޫރޯ ފުޓްބޯޅަ މުބާރާތް ކުރިއަށް ދިޔަ ދުވަސްވަރު އޭނާގެ ފަރާތުން ފެނިގެންދިޔަ އަޚުލާޤީ އިތުރު މައްސަލަތަކަކާ ގުޅޭ ފޮޓޯތަކެއް އިނގިރޭސި މީޑިއާގައި އާއްމުވެފައިވުމުގެ ސަބަބުން އިތުރު ތަހުގީގެއް ކުރިއަށް ގެންދިއުމަށްފަހު މަގާމުގައި ބެހެއްޓޭނެ އެއްވެސް ގޮތެއް ނެތުމުން ކަމަށް ބުނެ، ޕީޖީއެމްއޯއެލް އިން ވަނީ ކޫޓް ވަކިކޮށްފައެވެ.

ކޫޓް އަށް ދިން ސަސްޕެންޝަނާ ގުޅޭގޮތުން ޔުއެފާ އިން ބުނީ، ކޫޓް ވަނީ އޮފިޝަލުންގެ ސުލޫކީ މިންގަނޑުގެ އެންމެ އާދައިގެ ގަވާއިދުތަކާ ވެސް ހިލާފުވެފައި ކަމަށެވެ. އަދި، އޭނާގެ ފަރާތުން ފެނިގެންދިޔަ އަމަލުތަކުގެ ސަބަބުން ކުޅިވަރެއްގެ ގޮތުގައި ފުޓްބޯޅަ އާއި އެ އިދާރާގެ ވެސް އަގުވެއްޓިދާނެ ފަދަ ދަރަޖައަކަށް ގޮސްފައިވާ ކަމަށް ވެސް ޔުއެފާ އިން ބުނެފައިވެއެވެ.

ޔުއެފާ އިން ކޫޓް އަށް މި ދިން އަދަބުގެ ސަބަބުން، 2026 ވަނަ އަހަރުގެ ޖޫން މަހުގެ ނިޔަލަށް ޔުއެފާގެ މުބާރާތްތަކުގައި އޭނާ އަށް އޮފިޝަލްކަން ނުކުރެވޭނެ އެވެ.