އިނގިރޭސި ޕްރިމިއަރ ލެސްޓަރ ސިޓީ އަތުން 2-0 އިން ވެސްޓް ހޭމް ޔުނައިޓެޑް ރޭ މޮޅުވެއްޖެއެވެ.

މިއީ ލީގުގައި މޮޅެއް ނުލިބި ހަތަރު މެޗު ފުރިހަމަ ކުރުމަށްފަހު ވެސްޓް ހޭމް އެންމެ ފަހުން ކުޅުނު ދެ މެޗުގެ ތެރެއިން މޮޅުވި ދެވަނަ ފަހަރެވެ.

ވެސްޓް ހޭމްގެ ލަންޑަން ސްޓޭޑިއަމްގައި ރޭ ކުޅުނު މެޗުގައި އެ ޓީމުން ޖެހި ދެ ލަނޑު ވެސް ކާމިޔާބުކުރީ ފުރަތަމަ ހާފުގައެވެ. 

ރޭގެ މެޗުގައި ވެސްޓް ހޭމުން ލީޑު ނެގީ ތޯމަސް ސޫޗެކްގެ ލަނޑުންނެވެ. ފުރަތަމަ ހާފު ނިމެންދަނިކޮށް، ވެސްޓް ހޭމުން ޖެހި ދެވަނަ ލަނޑަކީ، ލެސްޓަރގެ ޑިފެންޑަރު، ޔަނިކް ވެސްޓަގާޑް އަތުން ބައިކޮޅަށް ވަތް ގޯލެކެވެ.

މި މޮޅާއެކު، ވެސްޓް ހޭމް ވަނީ ލީގުގެ 15 ވަނަ އަށް ކުރިއަށް ޖެހިލައިފައެވެ. އެ ޓީމަށް 27 މެޗުން ލިބިފައިވަނީ 33 ޕޮއިންޓެވެ. މި މެޗުން ބަލިވި ލެސްޓަރ އޮތީ ފުލުން ދެވަނައިގައެވެ. ލެސްޓަރ އަށް ލިބިފައިވަނީ 17 ޕޮއިންޓެވެ.