ފަލަސްތީނުގެ ޣައްޒާގައި ޙަމަލާތައް ހުއްޓައިލުމަށް މިހާރު ޢަމަލުކުރަމުންދާ އެއްބަސްވުމުގެ ދެވަނަ ފިޔަވަހި ފެށުމާ ގުޅޭ މަޝްވަރާތައް އިޒްރޭލާއި، ޤަތަރު އަދި އެމެރިކާގެ މަންދޫބުންނާ އެކު ފަށާފައިވާ ކަމަށް މިޞްރުން ބުނެފިއެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

މިޞްރުން ބުނީ އެ މަންދޫބުންގެ މެދުގައި ވަރަށް ފުޅާ ދާއިރާއެއްގައި މަޝްވަރާތައް ކުރެވެމުންދާ ކަމަށެވެ. އޭގެތެރޭގައި ޣައްޒާއަށް އެހީ ވެއްދުން އިތުރުކުރުމާ ގުޅޭ މަޝްވަރާތައް ވެސް ހިމެނޭ ކަމަށް މިޞްރުން ބުންޏެވެ.

މި މަޝްވަރާތަކަށް އިޒްރޭލުން މަންދޫބުން ފޮނުވީ، ޙަމާސްގެ ބެލުމުގެ ދަށުގައި ތިއްބާ މަރުވި އަސީރުންގެ ތެރެއިން ހަތަރު އަސީރެއްގެ ހަށިގަނޑު ޙަވާލުކުރުމާ ގުޅިގެންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

ދެވަނަ ފިޔަވަހީގައި ވަނީ ބާކީ ތިބި އަސީރުންނާއި ޤައިދީން މިނިވަންކުރުމުގެ އިތުރުން ޙަމަލާތައް ދާއިމީކޮށް ހުއްޓައިލުން ހިމަނައިފައެވެ.

ޙަމާސް ބެލުމުގެ ދަށުގައި އަދިވެސް އިތުރު 58 އަސީރުން ތިބި ކަމަށް ބެލެވޭއިރު، އޭގެ ތެރެއިން ގިނަ އަދަދެއްގެ ބަޔަކު ޔަހޫދީންގެ ޢުދުވާނީ ޙަމަލާތަކުގައި މަރުވެފައިވާ ކަމުގައި އެ ޖަމާޢަތުން ވަނީ ބުނެފައެވެ.