ENGLISH

04 އޭޕްރީލު 2025

Advertisement

މައުދަނުގެ އެއްބަސްވުމުގައި ސޮއިކުރުމާ ދިމާކޮށް، ޒެލެންސްކީ އާ މެދު ޓްރަމްޕް ގެންގުޅުއްވި ރާގު ބަދަލުވެއްޖެ

28 ފެބްރުއަރީ 2025

|

ހަސަން އާމިރު

އެމެރިކާގެ ރައީސް ޑޮނަލްޑް ޓްރަމްޕް.

ޔޫކްރޭނުގެ އަގުބޮޑު މައުދަނުތަކާ ގުޅޭ އެއްބަސްވުމެއްގައި ސޮއި ކުރަން ތައްޔާރުވެފައިވަނިކޮށް، ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ އާ މެދު އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވި ހަރުކަށި ރާގު ބަދަލުކުރައްވައިފިއެވެ.

ރަޝިޔާއާ ދެކޮޅަށް ކުރަމުންދާ ހަނގުރާމައިގައި އެމެރިކާއިން ފޯރުކޮށްދީފައިވާ އަސްކަރީ އެހީގެ އަގު އަދާކުރަން، ޔޫކްރޭނުގެ އަގުބޮޑު މައުދަނުތައް ދިނުމުގެ އެއްބަސްވުމަކަށް އެމެރިކާއިން ޔޫކްރޭނަށް ކުރަމުންދާ ޕްރެޝަރު، ޓްރަމްޕް އިސްވެ ވަނީ ވަރުގަދަކޮށްފައެވެ.

ޒެލެންސްކީ އަކީ "ޑިކްޓޭޓަރެއް"ގެ ގޮތުގައި ސިފަކުރައްވައި، ޓްރަމްޕްގެ ފާޑުވިދާޅުވުން ހަރުކަށި ކޮށްފައިވަނީ އެ އެއްބަސްވުމަށް ބާރުއެޅުމަށް ކަމަށް މަސްރަޙް ދިރާސާކުރާ ފަރާތްތަކުން ދަނީ ބުނަމުންނެވެ.

އެއާއެކު، ދެ ޤައުމުގެ ދެމެދު އޮތް ޚިޔާލުތަފާތުވުންތައް ހައްލުކޮށް، މާދަމާގެ ހެނދުނުގެ ވަގުތެއްގައި ޒެލެންސްކީ އެމެރިކާއަށް ކުރައްވާ ދަތުރުފުޅުގައި، މައުދަންތަކާ އެއްބަސްވުމުގައި ސޮއިކުރުމަށް މިހާރު ވަނީ ހަމަޖެހިފަ އެވެ.

"އަޅުގަނޑު ޔަޤީންކުރަން މާދަމާ ހެނދުނު ވަރަށް ރަނގަޅު ބައްދަލުވުމެއް އެ މަނިކުފާނާ [ޒެލެންސްކީ] އާ އަކީ ބޭއްވޭނެ ކަމަށް،" ޓްރަމްޕް ނޫސްވެރިންނަށް ވިދާޅުވިއެވެ.

"އަޅުގަނޑު ވަރަށް އިޙްތިރާމް ކުރާ ބޭފުޅެއް [ޒެލެންސްކީ] އެއީ."

ޒެލެންސްކީ އަކީ "ޑިކްޓޭޓަރެއް"ގެ ގޮތުގައި ސިފަކުރެއްވި ކުރެއްވުމާ ގުޅޭގޮތުން ނޫސްވެރިއަކު ސުވާލުކުރުމުން، ޓްރަމްޕް ވަނީ އެއީ ވިދާޅުނުވާ ވާހަކައެއްގެ ގޮތުގައި އަނބުރާލައްވަން މަސައްކަތް ކުރައްވައިފައެވެ.

"އަޅުގަނޑު އެހެން ބުނިންތޯ؟ އަޅުގަނޑަށް ޤަބޫލެއްވެސް ނުކުރެވޭ އެއީ އަޅުގަނޑު ބުނި އެއްޗެއް ހެނެއް،" ޓްރަމްޕް ވިދާޅުވި އެވެ.

ރަސްމީ ބައެއް މަސްދަރުތަކުން ލިބޭ މަޢުލޫމާތުތަކަށް ބަލާއިރު، އެމެރިކާ އާއި ޔޫކްރޭނުން އެއްބަސްވެފައިވަނީ، އެމެރިކާގެ އެހީގައި ޔޫކްރޭނުގެ މައުދަނުތަކުން ލިބޭ އާމްދަނީ، ދެ ޤައުމު ގުޅިފައިވާ ފަންޑަކަށް ޖަމާކުރުމަށެވެ.

އެމެރިކާއިން ބާރުއެޅިޔަސް، އެފަދަ އެއްބަސްވުމެއް އެކުލަވައިލުމަށް ޔޫކްރޭނުން މީގެކުރިން ދެކޮޅު ހަދާފައިވަނީ، ޔޫކްރޭނަށް ސަލާމަތީ ގޮތުން އެމެރިކާ އިން އެހީތެރިކަން ފޯރުކޮށްދޭނެކަމުގެ ޔަގީންކަން ލިބިފައިނުވާ ކަމަށް ބުނެއެވެ.

ނަމަވެސް، މިހާރު އެކުލަވާލެވިފައިވާ އެއްބަސްވުމުގައި އެފަދަ މާއްދާއެއް ހިމަނާފައިވާ ކަމަށް މަޢުލޫމާތު ލިބިފައިވިޔަސް، ޔޫކްރޭނަށް ސަލާމަތީ ގޮތުން އެމެރިކާއިން ފޯރުކޮށްދެނީ ކޮން ކަހަލަ އެހީތެރިކަމެއް ކަމެއް އަދި ސާފެއް ނޫނެވެ.

އެމެރިކާ އާ އެކު ހަދާ އެއްބަސްވުމުގައި 500 ބިލިއަން އެމެރިކާ ޑޮލަރުގެ މައުދަނު ދޭން ހިމަނާފައި އޮތް މާއްދާއާ މެދު ޔޫކްރޭނުން އިޢުތިރާޒުކުރާތީ، އަލަށް އެކުލަވައިލި އެއްބަސްވުމުގައި ސީދާ އަދަދެއް ހިމަނާފައިނުވާކަން އެނގިފައިވެއެވެ.

ޔޫކްރޭނަކީ، މަތިންދާބޯޓާއި، ބެޓެރި، ހަތިޔާރު އަދި އިލެކްޓްރޯނިކްސް އުފެއްދުމުގައި ބޭނުންކުރާ ގްރެފައިޓް، ލިތިއަމް އަދި ޓައިޓޭނިއަމް ފަދަ އަގުބޮޑު މައުދަނުތަކުން މުއްސަނދި ޤައުމެކެވެ.

ކިޔުންތެރިންގެ ހިޔާލު