އިޓާލިއަން ލީގުގައި ރޭ ކުޅުނު މެޗުގައި ބޮލޯނިއާ އަތުން 2-1 އިން ބަލިވެ، އޭސީ މިލާނަށް ގަދަ ހަތަރެއްގެ ރޭހުގައި ހުރަސްތަކެއް ކުރިމަތިވެއްޖެއެވެ.

މިއީ 23 އަހަރުގެ ތެރޭގައި ބޮލޯނިއާގެ ދަނޑުގައި، ލީގުގައި މިލާން އަތުން އެ ޓީމު މޮޅުވި ފުރަތަމަ ފަހަރެވެ.

ބޮލޯނިއާގެ ދަނޑުގައި ކުޅުނު މެޗުގައި ފުރަތަމަ ހާފު ނިމެންދަނިކޮށް މިލާނަށް ލީޑު ނަގައިދިނީ ރަފައެލް ލެއާއޯ އެވެ. 

ދެވަނަ ހާފުގެ ކުރީކޮޅު، ބޮލޯނިއާ އަށް އެއްވަރުކޮށްދިނީ ސަންޓިއާގޯ ކާސްޓްރޯ އެވެ.

މެޗުގެ ފަހު 10 މިނެޓުގެ ތެރޭގައި ބޮލޯނިއާ މޮޅުވި ލަނޑު ޖަހައިދިނީ ޑޭން އެންޑޮޔޭ އެވެ.

މި ނަތީޖާއާ އެކު، މިލާން ވަނީ ތާވަލްގެ 8 ވަނަ އަށް ވެއްޓިފައެވެ. އެ ޓީމަށް 26 މެޗުން ލިބިފައިވަނީ 41 ޕޮއިންޓެވެ. މި މެޗުން މޮޅުވި ބޮލޯނިއާ އޮތީ ހަވަނައިގައެވެ. އެ ޓީމަށް ލިބިފައިވަނީ 44 ޕޮއިންޓެވެ.

ލީގުގައި މިލާނަށް ދެން އޮތީ އަންނަ މަހުގެ 3 ވަނަ ދުވަހު އަމިއްލަ ދަނޑުގައި ލާޒިއޯއާ ބައްދަލުކުރަންޖެހޭ މެޗެވެ.