އިނގިރޭސި ޕްރިމިއަރ ލީގުގައި ރޭ ކުޅުނު މެޗުގައި ނޮޓިންގހަމް ފޮރެސްޓާ އާސެނަލް ބައްދަލުކުރި މެޗު އެއްވަރުވެ، ލިވަޕޫލުން ނިއުކާސަލް ޔުނައިޓެޑް ބަލިކޮށް، ތާވަލްގެ ކުރީގައި 13 ޕޮއިންޓްގެ ލީޑެއް ނަގައިފިއެވެ.

މި ނަތީޖާއާ އެކު، ލިވަޕޫލް އެއްވަނައިގައި އުޅެނީ 28 މެޗުން 67 ޕޮއިންޓް ހޯދައިގެންނެވެ. ދެވަނައިގައި އޮތް އާސެނަލަށް އެއް މެޗު މަދުން ކުޅެގެން 54 ޕޮއިންޓް ލިބިފައިވާއިރު، ހަ ޕޮއިންޓް ފަހަތުން ތިންވަނައިގައި އޮތީ ނޮޓިންހަމް ފޮރެސްޓެވެ. ހަތަރު ވަނައިގައި އޮތް މެންޗެސްޓަރ ސިޓީ އަށް ލިބިފައިވަނީ 47 ޕޮއިންޓެވެ.

އެންފީލްޑްގައި ކުޅުނު މެޗުގައި ލިވަޕޫލް ވަނީ 2-0 އިން ނިއުކާސަލް ބަލިކޮށްފައެވެ. މި މެޗުގައި ލިވަޕޫލްގެ ލަނޑުތައް ޖަހައިދިނީ ޑޮމިނިކް ސޮބޯޒްލާއީ އާއި އަލެކްސިސް މެކްއެލިސްޓާ އެވެ.

މި މެޗުން ބަލިވި ނިއުކާސަލް ވަނީ ތާވަލްގެ ހަވަނަ އަށް ވެއްޓިފައެވެ. އެ ޓީމަށް ލިބިފައިވަނީ 44 ޕޮއިންޓެވެ.

ފޮރެސްޓްގެ ދަނޑުގައި ރޭ ކުޅުނު މެޗުގައި އެ ޓީމު ވަނީ ލަނޑެއް ނުޖެހި އާސެނަލްއާ އެއްވަރުވެފައެވެ. މި މެޗުގައި ދެ ޓީމަށް ވެސް ލަނޑުޖަހާނެ ހުސް ފުރުޞަތެއްލިބިފައިނުވާއިރު، ފުރަތަމަ ހާފުގައި އާސެނަލްގެ ޑިފެންޑަރު، ރިކާޑޯ ކަލަފިއޯރީ ފޮނުވާލި ބޯޅައެއް ގޯލްގެ އަރިމަތީ ދަނޑިއަށް އަމާޒުވެފައިވެއެވެ.

މުބާރާތުގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ޓޮޓްނަމް ހޮޓްސްޕަރގެ ދަނޑުގައި އެ ޓީމު ވަނީ 1-0 އިން ސިޓީ އަތުން ބަލިވެފައެވެ. މެންޗެސްޓަރ ޔުނައިޓެޑްގެ ދަނޑުގައި އެ ޓީމު ވަނީ 3-2 އިން އިޕްސްވިޗް ޓައުން ބަލިކޮށްފައެވެ. ބްރެންޓްފޯޑާ އެވަޓަން ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.