އިޓާލިއަން ކަޕްގައި ރޭ ކުޅުނު މެޗުގައި ލާޒިއޯ 2-0 އިން ބަލިކޮށް، އިންޓަރ މިލާނުން އެ މުބާރާތުގެ ސެމީ ފައިނަލުން ޖާގަ ހޯދައިފިއެވެ.

މިއީ އެ ޓީމުން މިދިޔަ ހަ ސީޒަނުގެ ތެރެއިން އިޓާލިއަން ކަޕްގެ ސެމީގައި ކުޅޭ ފަސްވަނަ ފަހަރެވެ. މިއާއެކު، އިންޓަރ ވަނީ މުޅިއެކު 30 ފަހަރު އެ މުބާރާތުގެ ސެމީ ފައިނަލަށް ދަތުރުކޮށްފައެވެ.

ސެން ސީރޯގައި ކުޅުނު މެޗުގައި އިންޓަރ އިން ލީޑު ނެގީ ފުރަތަމަ ހާފު ނިމެންދަނިކޮށް، އޮސްޓްރިއާގެ ތަޖުރިބާކާރު ފޯވާޑް، މާކޯ އާނައުޓޮވިޗް ވައްދާލި ލަނޑުންނެވެ.

މެޗުގައި އިންޓަރގެ ދެވަނަ ލަނޑުޖަހައިދިނީ 77 ވަނަ މިނެޓުގައި ލިބުނު ޕެނަލްޓީއަކުން ހަކާން ޗައަނޮގްލޫ ކާމިޔާބުކުރި ގޯލުންނެވެ.

މުބާރާތުގެ ސެމީގައި އިންޓަރ ނިކުންނާނީ ވާދަވެރި އޭސީ މިލާނާ ދެކޮޅަށެވެ. މި ދެ ޓީމުގެ މެދުގައި ކުޅުމަށް ހަމަޖެހިފައިވާ ސެމީގެ ދެ ލެގުގެ މެޗުތައް ކުޅުމަށް ހަމަޖެހިފައިވަނީ އަންނަ އޭޕްރީލް މަހު އެވެ.