އިނގިރޭސި ޕްރިމިއަރ ލީގުގައި ރޭ ކުޅުނު މެޗުގައި ސައުތެމްޓަން އަތުން 4-0 އިން ހޯދީ މޮޅާއެކު ޗެލްސީ އިން ތާވަލްގެ ހަތަރުވަނަ އަށް ޖެހިލައިފިއެވެ.

މިއީ ލީގުގައި ޗެލްސީ އެންމެ ފަހުން ކުޅުނު ތިން މެޗުގެ ތެރެއިން މޮޅުވި ފުރަތަމަ ފަހަރެވެ. އަނެއް ދެ މެޗުން ވަނީ އެ ޓީމު ބަލިވެފައެވެ.

ޗެލްސީގެ ސްޓެމްފޯޑް ބްރިޖްގައި ކުޅުނު މެޗުގައި އެ ޓީމުގެ ލަނޑުތައް ޖަހައިދިނީ ކްރިސްޓޮފާ އެންކުންކޫ، ޕެޑްރޯ ނެޓޯ، ލެވީ ކޯލްވިލް އާއި މާކް ކުކުރޭޔާ އެވެ.

މި ނަތީޖާއާއެކު، ޗެލްސީ ވަނީ 27 މެޗުން 46 ޕޮއިންޓް ހަމަކޮށް، ހަތަރުވަނަ އަށް ޖެހިލައިފައެވެ. އޭގެ ދެ ޕޮއިންޓް ފަހަތުން ފަސްވަނައިގައި އޮތީ މެންޗެސްޓަރ ސިޓީ އެވެ.

މި މެޗުން ބަލިވި ސައުތެމްޓަން އޮތީ އެންމެ ފުލުގައެވެ. އެ ޓީމަށް ލިބިފައިވަނީ ނުވަ ޕޮއިންޓެވެ.

މި މުބާރާތުގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ބްރައިޓަން ވަނީ 2-1 އިން ބޯންމަތު ބަލިކޮށްފައެވެ. ކްރިސްޓަލް ޕެލަސްގެ ދަނޑުގައި އެ ޓީމު އަތުން އެސްޓަން ވިލާ ބަލިވީ 4-1 އިންނެވެ.