ސްޕެނިޝް ކޮޕަ ޑެލް ރޭގައި ރޭ ކުޅުނު ސެމީ ފައިނަލުގެ ފުރަތަމަ ލެގުގެ މެޗުގައި ބާސެލޯނާއާ 4-4 އިން އެތުލެޓިކޯ މެޑްރިޑް އެއްވަރުވެއްޖެއެވެ.

ބާސެލޯނާގެ ދަނޑުގައި ކުޅުނު މެޗުގެ ފުރަތަމަ ހަ މިނެޓުގެ ތެރޭގައި އެތުލެޓިކޯ އިން ވަނީ ދެ ލަނޑުގެ ލީޑެއް ނަގައިފައެވެ. އެ ޓީމުން ލީޑު ނެގީ ފުރަތަމަ މިނެޓުގައި އާޖެންޓީނާ ފޯވާޑް، ހޫލިއަން އަލްވަރޭޒް ވައްދާލި ލަނޑުންނެވެ. އޭގެފަހުން، އެންޓޮއިން ގްރީޒްމަން ވަނީ ނަތީޖާ 2-0 އަށް ބަދަލުކޮށްލާފައެވެ.

އޭގެފަހުން، ދެ މިނެޓުގެ ތެރޭގައި ޕެޑްރީ އާއި ޕައު ކުބާސީ ޖެހި ދެ ލަނޑާއެކު ބާސެލޯނާ އިން އެއްވަރުކުރިއެވެ. އަދި، ފުރަތަމަ ހާފު ނިމުމުގެ ކުރިން، އިނީގޯ މާޓިނޭޒް ވަނީ ތިން ވަނަ ލަނޑެއް ޖަހައި، ބާސެލޯނާ އަށް ފުރަތަމަ ފަހަރަށް ލީޑު ނަގައިދީފައެވެ.

މެޗުގެ 74 ވަނަ މިނެޓުގައި ބާސެލޯނާގެ ޕޮލެންޑް ފޯވާޑް، ރޮބަޓް ލެވަންޑޯސްކީ ކާމިޔާބުކުރި ގޯލާއެކު އެ ޓީމުން 4-2 އިން ލީޑު ނެގިއެވެ.

އެތުލެޓިކޯ އިން ވަނީ 84 ވަނަ މިނެޓާއި، އިތުރު ވަގުތުގެ ތިންވަނަ މިނެޓުގައި މާކޮސް ލޮރެންޓޭ އާއި އަލެކްސެންޑާ ސޯލޯތުގެ ގޯލުން ނަތީޖާ އެއްވަރުކޮށްފައެވެ.

މުބާރާތުގެ ސެމީގެ ދެވަނަ ލެގުގެ މެޗުގައި މި ދެ ޓީމު ބައްދަލުކުރާނީ އަންނަ އޭޕްރީލް މަހުގެ ފުރަތަމަ ހަފްތާގައެވެ.