"ގޯލްޑަން ފުޓްސަލް ޗެލެންޖް 2025" މުބާރާތުގެ ފައިނަލުގައި ކ. ކާށިދޫ އާއި ހދ. ނައިވާދޫ ބައްދަލުކުރި މެޗާއި، މުބާރާތް ނިންމުމުގެ ރަސްމިއްޔާތު، ރައީސުލްޖުމްހޫރިއްޔާގެ ނައިބު، އަލްއުސްތާޛު ހުސައިން މުޙައްމަދު ލަޠީފު ޝަރަފުވެރިކޮށްދެއްވައިފިއެވެ.

މި މުބާރާތުގެ ފައިނަލް މެޗާއި މުބާރާތް ނިންމުމުގެ ރަސްމިއްޔާތު ބާއްވާފައި ވަނީ ރޭ ހުޅުމާލެ ރެހެންދި ފުޓްސަލް ދަނޑުގައެވެ.

ރޭގެ މެޗު 4-1 ގެ ނަތީޖާއަކުން ކާމިޔާބުކޮށް، "ގޯލްޑަން ފުޓްސަލް ޗެލެންޖް 2025" މުބާރާތުގެ ޗެމްޕިއަންކަން ހޯދީ ކ. ކާށިދޫ އިންނެވެ. ޗެމްޕިއަން ޓީމަށް މެޑެއްޔާއި ޓްރޮފީ ހަވާލުކޮށްދެއްވީ ނައިބު ރައީސް އެވެ.

ރޭގެ ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ވަނީ މުބާރާތުގެ އެންމެ މޮޅު ކުޅުންތެރިޔާ "ކިންގ އޮފް ފުޓްސަލް" ގެ މަގާމަށް ހޮވުނު ކާށިދޫ ޓީމުގެ ކީޕަރު، މުޙައްމަދު ސަލީލްގެ ބޮލުގައި ތާޖު އަޅުއްވައިދެއްވާފައެވެ.

"ގޯލްޑަން ފުޓްސަލް ޗެލެންޖް 2025" މުބާރާތަކީ މުޅި ރާއްޖެއަށް ހުޅުވާލައިގެން އަމިއްލަ ފަރާތަކުން ރާވާ، ހިންގަމުން އަންނަ ފުޓްސަލް މުބާރާތެކެވެ. މިދިޔަ މަހުގެ 6 ގައި ފެށި މި މުބާރާތުގައި ރާއްޖޭގެ އެކި ކަންކޮޅުތަކުން 128 ޓީމަކުން ވާދަކުރިއެވެ.