މިހާރު ކުރިއަށްދާ 29 ވަނަ އެމްބީއޭ ޗެމްޕިއަންޝިޕްގައި ކުޅުނު ސެމީ ފައިނަލުގެ ދެވަނަ މެޗުގައި މިރޭ ރެޕްޓާސް ބާސްކެޓްބޯލް ކުލަބު ބަލިކޮށް، ކިންގްސް ބާސްކެޓްބޯލް ކުލަބުން ފައިނަލުން ޖާގަ ހޯދައިފިއެވެ.

ޒުވާނުންގެ މަރުކަޒު އެތެރޭ ކޯޓުގައި މިރޭ ކުޅުނު މެޗުން ރެޕްޓާސް އަތުން ކިންގްސް މޮޅުވީ 76-50 އިންނެވެ.

މެޗު ފެށިގެން ފުރަތަމަ ކުއާޓާގައި ރެޕްޓާސް އިން ނެގި ލީޑު ފިޔަވައި، އެ ޓީމަށް ކިންގްސްގެ މައްޗަށް ކުރިހޯދިފައެއް ނުވެއެވެ. ރެޕްޓާސް އިން މި ކުއަޓާގައި 18-11 އިން ކުރީގައި އޮވެގެން ނިންމާލިނަމަވެސް، ކިންގްސް އިން ވަނީ ދެވަނަ ކުއާޓާގައި 23-10 އިން ނެގި ލީޑާއެކު، ހަ ޕޮއިންޓްގެ ލީޑެއްގައި އޮވެ، ހާފު ނިންމާލައިފައެވެ.

ދެވަނަ ކުއާޓާއެކޭ އެއްގޮތަށް، ކިންގްސް އިން ވަނީ، ތިންވަނަ ކުއާޓާގައި ވެސް 26-12 އިން ނެގި ލީޑާއެކު، މެޗުގެ ކޮންޓްރޯލް އެއްކޮށް އަތުލާފައެވެ. އެ ޓީމުން ފަހު ކުއާޓާގައި ވެސް 16-10 އިން ކުރިހޯދައި، މެޗު ކާމިޔާބުކުރީ ވެސް 26 ޕޮއިންޓްގެ ފަރަގަކުންނެވެ.

މި މެޗުން ކިންގްސް މޮޅުކޮށްދިނުމުގައި އެންމެ އިސްދައުރެއް އަދާކުރީ މުޙައްމަދު ޖިދާދު އިބްރާހިމް ޔާދު އެވެ. ޖިދާދު ވަނީ 27 ޕޮއިންޓާއެކު ނުވަ ރީބައުންޑް ނަގައިފައެވެ. މީގެއިތުރުން، އެ ޓީމުގެ އަބްދުﷲ އަމްޒަރު މުޙައްމަދުގެ ކުޅުން ފާހަގަކޮށްލެވުނެވެ. އަމްޒަރު ވަނީ 15 ޕޮއިންޓާއެކު ނުވަ ރީބައުންޑް ނަގައިފައެވެ.

ރެޕްޓާސް އަށް އެންމެ ގިނަ ޕޮއިންޓް އެއްކޮށްދިނީ މަފާޒް މުޙައްމަދު އެވެ. އޭނާ ވަނީ 11 ޕޮއިންޓް އެއްކޮށްފައެވެ. އެ ޓީމަށް ދެން އެންމެ ރަނގަޅަށް ކުޅުނީ ނުވަ ޕޮއިންޓާއެކު އަށް ރީބައުންޑްނެގި އަހުމަދު ރާއިދު ސަލީމް އެވެ.

މުބާރާތުގެ ފައިނަލުގައި ކިންގްސް އިން ނުކުންނާނީ ޓީ-ރެކްސް ބާސްކެޓްބޯލް ކުލަބާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 28 ވާ ހުކުރު ދުވަހު އެވެ.