އައިސީސީ ޗެމްޕިއަންސް ޓްރޮފީގައި އިއްޔެ ކުޅުނު މެޗުގައި ބަންގްލަދޭޝް ބަލިކޮށް، ނިއު ޒީލަންޑް މުބާރާތުގެ ސެމީ ފައިނަލަށް ދަތުރުކޮށްފިއެވެ.

މި މެޗުން ނިއު ޒީލަންޑް މޮޅުވީ ފަސް ވިކެޓުންނެވެ.

ޕާކިސްތާނުގެ ރާވަލްޕިންޑީ ކްރިކެޓް ސްޓޭޑިއަމްގައި ކުޅުނު މި މެޗުގެ ޓޮސް ދިމާވުމުން ނިއު ޒީލަންން ގަސްދުކުރީ ހޮވަން އަރާށެވެ. 

ބަންގްލަދޭޝް އިން ކުޅެން އަރައި، 50 އޯވަރުގެ ތެރޭގައި ނުވަ ވިކެޓަށް 236 ލަނޑު ހެދިއެވެ. އެ ޓީމުން އެންމެ ރަނގަޅަށް ކުޅުނީ ކެޕްޓަން، ނަޖްމުލް ހޮސެއިން ޝާންޓޯ އެވެ. އޭނާ ވަނީ 77 ލަނޑު ހަދައިފައެވެ.

މި އިނިންގްސްގައި ނިއު ޒީލަންޑުން އެންމެ ރަނގަޅަށް އުކީ ހަތަރު ވިކެޓް ނެގި މައިކަލް ބްރޭސްވެލްއެވެ. މީގެއިތުރުން، އެ ޓީމުގެ ވިލް އޯ'ރޯކޭ ވެސް ދެ ވިކެޓް ނެގިއެވެ.

ޖަވާބުގައި ކުޅެން އަރައި، ނިއު ޒީލަންޑު ވަނީ 46.1 އޯވަރުގެ ތެރޭގައި ފަސް ވިކެޓަށް 240 ލަނޑު ހަދައިފައެވެ. އެންމެ ރަނގަޅަށް ކުޅުނު ރަޗިން ރަވިންދްރަ ވަނީ 105 ބޯޅައިން 112 ލަނޑު ހަދައިފައެވެ. ދެން އެންމެ ރަނގަޅަށް ކުޅުނީ ވިކެޓްކީޕަރު، ބެޓްސްމަން ޓޮމް ލޭތަމް އެވެ. އޭނާ ނުބައިވީ 55 ލަނޑަށެވެ.

މެޗުގެ މޮޅު ކުޅުންތެރިޔާގެ މަގާމަށް ހޮވުނީ ނިއު ޒީލެންޑްގެ މައިކަލް ބްރޭސްވެލްއެވެ.

މުބާރާތުގައި ނިއު ޒީލަންޑަށް ދެން އޮތީ އަންނަ އާދިއްތަ ދުވަހު އިންޑިއާއާ ދެކޮޅަށް ކުޅެން ޖެހޭ މެޗެވެ. ގްރޫޕް އޭގައި ހިމެނޭ މި ދެ ޓީމު ވަނީ މިހާތަނަށް ކުޅުނު ދެ މެޗު ވެސް ކާމިޔާބުކޮށް، ސެމީ ފައިނަލުން ޖާގަ ހޯދައިފައެވެ.