ދިވެހި ސާފް ލީގު 2025 އަށް މޯލްޑިވްސް ސާފިންގ އެސޯސިއޭޝަން (އެމްއެސްއޭ) އިން "ކެރަންދޫ" ނަމުގައި އައު މުބާރާތެއް ލ. މާބައިދޫގައި ބާއްވަން އެ ރަށު ކައުންސިލާއެކު ފަހުމުނާމާއެއްގައި ސޮއިކޮށްފިއެވެ.

މި އެމްއޯޔޫގައި އެމްއެސްއޭގެ ފަރާތުން ސޮއިކުރެއްވީ، އެމްއެސްއޭގެ ރައީސް، މުޙައްމަދު ސޮބާހު އެވެ. އަދި މާބައިދޫ ކައުންސިލްގެ ފަރާތުން ސޮއިކުރެއްވީ، ކައުންސިލްގެ ރައީސް މުޙައްމަދު ވިސާމް އެވެ.

މާބައިދޫގައި "މެޝިން" ގެ ނަމުން މަޝްހޫރުވެފައިވާ ރާޅުގަނޑު ސަރަހައްދުގައި ބޭއްވުމަށް ހަމަޖެހިފައިވާ މި މުބާރާތުގެ ޓައިޓަލް ސްޕޮންސަރަކީ މާބައިދޫގެ ކައުންސިލެވެ.

މި ރަސްމިއްޔާތުގައި ވާހަކަދައްކަވަމުން އެމްއެސްއޭގެ ރައީސް، މުޙައްމަދު ސޮބާހު ވިދާޅުވީ، ލ. އަތޮޅަކީ ރާއްޖޭގެ ފެންވަރުގައި ވެސް އެންމެ ރާޅު ރީތި އެއް ސަރަހައްދު ކަމަށާއި، މި މުބާރާތް ލ. މާބައިދޫގައި ބޭއްވިގެން ދިއުމަކީ އެ ރަށުގެ ރައްޔިތުންގެ އިތުރުން މުޅި ސާފިންގ ކޮމިއުނިޓީ ވެސް ކުރަމުން އައި ދިގު އިންތިޒާރަކަށް ނިމުންއައިސް، އެ ހުވަފެންތައް ހަގީގަތަކަށްވެގެން ދިއުން ކަމަށެވެ.

އަދި، ދިވެހި ސާފް ލީގަށް އިތުރުވެގެންދިޔަ މި އިވެންޓާ ގުޅިގެން އެ ސަރަހައްދުން ވެސް ރާޅާއަޅާ އިތުރު ހުނަރުވެރި އެތުލީޓުން ފެންނާނެ ކަމަށް އުއްމީދުކުރާ ކަމަށް ވެސް ސޮބާހު ވިދާޅުވިއެވެ.

"ކެރަންދޫ" ގެ ނަމުގައި ދިވެހި ސާފް ލީގަށް އިތުރުކުރެވުނު އައު މުބާރާތާއެކު، މި އަހަރުގެ ތެރޭގައި ބޭއްވުމަށް މިވަނީ ސާފިންގެ ތިން މުބާރާތެއް ތާވަލްކުރެވިފައެވެ.

އެގޮތުން، މި ފަހަރުގެ ސާފިންގ ލީގު ފެށިގެންދާނީ އަންނަ ޖުލައި މަހުގެ ތެރޭގައި މ. މުލީގައި ބާއްވާ "މުލީކޮޅު ރާޅުގަނޑު" މުބާރާތުންނެވެ. އެއަށްފަހު، "ކެރަންދޫ" ގެ ނަމުގައި މުޅިން އަލަށް ބާއްވާ މުބާރާތް ސެޕްޓެންބަރު މަހުގައި މާބައިދޫގައި ކުރިއަށްދާއިރު، އަހަރުގެ ފަހު އިވެންޓެއްގެ ގޮތުގައި މާލޭގައި "ރަންނަމާރި ޗެލެންޖް" އޮންނާނެ އެވެ.

އެމްއެސްއޭ އިން ބުނީ، އަހަރުގެ ފަހު މުބާރާތް ކަމަށްވާ، "ރަންނަމާރި ޗެލެންޖް" އަށް ހޮވޭނީ "މުލީކޮޅު ރާޅުގަނޑާއި" "ކެރަންދޫ"ގައި ވެސް ވާދަކޮށްފައިވާ އެތުލީޓުންނަށް ކަމަށެވެ. އަދި، ސާފު ލީގުގެ އެއްވަނަ މަގާމަށް އެތުލީޓެއް ހޮވުމުގައި ބަލާނީ، ތިން މުބާރާތުގެ ތެރެއިން އެންމެ މަތިން ސްކޯކުރި ދެ މުބާރާތެއްގެ ނަތީޖާއަށް ކަމަށްވެސް އެމްއެސްއޭ އިން ވަނީ ބުނެފައެވެ.