ތިންވަނަ ސައުތު އޭޝިއަން ބާސްކެޓްބޯލް އެސޯސިއޭޝަން (ސާބާ) ވިމެންސް ޗެމްޕިއަންޝިޕްގައި ނޭޕާލް ބަލިކޮށް ދިވެހިރާއްޖޭން އެ މުބާރާތުގެ ފައިނަލަށް ދަތުރުކޮށްފިއެވެ.

މިއީ މި މުބާރާތުގެ ތާރީޚުގައި ރާއްޖޭން ފައިނަލަށް ދަތުރުކުރި ފުރަތަމަ ފަހަރެވެ. މީގެ ކުރިން، ދެ ފަހަރެއްގައި ރާއްޖޭން ވަނީ ލޯ މެޑެލް ހާސިލްކޮށްފައެވެ.

އިންޑިއާގެ ނިއު ދިއްލީގައި މިހާރު ކުރިއަށްދާ މުބާރާތުގައި އިއްޔެ ކުޅުނު މެޗުން ރާއްޖެ ވަނީ 53-46 އިން ނޭޕާލް ބަލިކޮށްފައެވެ.

އިއްޔެގެ މެޗުގައި ރާއްޖެ އަށް އެންމެ ގިނަ ޕޮއިންޓް އެއްކޮށްދިނީ ރައިފާ އިބްރާހިމް އެވެ. އޭނާ ވަނީ 19 ޕޮއިންޓާއެކު، ހަތަރު ރީބައުންޑްނަގައި، އެއް އެސިސްޓް ހަދާފައެވެ. 

މި ފަހަރުގެ ސާބާ މުބާރާތް މި ބާއްވަނީ ތިން އަހަރު ދުވަހުގެ މެދުކެނޑުމަކަށް ފަހު އެވެ. އެންމެ ފަހުގެ މުބާރާތުގެ ޗެމްޕިއަން، ސްރީ ލަންކާ އިން މި އަހަރު ވާދަނުކުރެއެވެ. މި އަހަރުގެ މުބާރާތުގައި ރާއްޖެ އާއި ނޭޕާލްގެ އިތުރުން ދެން ވާދަކޮށްފައިވަނީ އިންޑިއާ އެވެ.

މި މުބާރާތުގެ ފައިނަލް މެޗު މާދަމާ ކުޅުމަށް ހަމަޖެހިފައިވާއިރު، ލީގު ބުރުގައި އިންޑިއާއާ ދެކޮޅަށް ރާއްޖޭން ކުޅޭ މެޗު އޮންނާނީ މިރެ އެވެ.