މިހާރު ކުރިއަށްދާ 19 އަހަރުން ދަށުގެ ޔޫތު ޗެމްޕިއަންޝިޕްގައި އިއްޔެ ކުޅުނު މެޗުގައި މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވެ، ކުލަބު ވެލެންސިއާ ކެޓިއިރު، ކުލަބް އީގަލްސް ސެމީ ފައިނަލަށް ދަތުރުކޮށްފިއެވެ.

މި ނަތީޖާއާއެކު، ގްރޫޕް އޭގެ އެއްވަނައިގައި މާޒިޔާ ނިންމާލީ ހަތަރު މެޗުން ސައްތައިން ސައްތައިގެ ރެކޯޑަކާއެކު އެވެ. ދެވަނައިގައި އޮތް އީގަލްސް އަށް ލިބުނީ ނުވަ ޕޮއިންޓެވެ. ވެލެންސިއާ އަށް ލިބުނީ ހަ ޕޮއިންޓެވެ.

ގަލޮޅު ރަސްމީ ދަނޑުގައި ރޭ ކުޅުނު މެޗުގައި ވެލެންސިއާ އަތުން މާޒިޔާ މޮޅުވީ 1-2 އިންނެވެ.

މި މެޗުގައި މާޒިޔާގެ ލަނޑުތައް ޖަހައިދިނީ އަނޫފް އަބްދުﷲ އާއި އަހުމަދު ހަމީސް އަރީފް އެވެ. ވެލެންސިއާގެ ހަމައެކަނި ލަނޑުޖެހީ އަހުމަދު ހަމްދާން އަޒްލީން އެވެ.

މި މުބާރާތުގައި އިއްޔެ ހަވީރު ކުޅުނު މެޗުގައި އީގަލްސް ވަނީ 5-0 ގެ ތަފާތަކުން ކުލަބު ގްރީން ސްޓްރީޓްސް ބަލިކޮށްފައެވެ. 

މެޗުގައި އީގަލްސް އިން ޖެހި ފަސް ލަނޑުގެ ތެރެއިން ދެ ގޯލް ޖަހައިދިނީ އައްޝާމް އިބްރާހިމް މުޙައްމަދު އެވެ. އެ ޓީމުގެ އަނެއް ލަނޑުތައް ޖަހައިދިނީ މުޙައްމަދު ޝަމްހާން، މުޙައްމަދު އައިމަން ހަސަން އާއި މުޙައްމަދު ޝިޒާން އެވެ.

މުބާރާތުގެ ސެމީގެ މެޗުތައް މާދަމާ ކުޅުމަށް ހަމަޖެހިފައިވާއިރު، ފައިނަލު މެޗު ތާވަލްކޮށްފައި ވަނީ މި މަހުގެ 28 ވާ ހުކުރު ދުވަހުގެ ރޭގަނޑަށެވެ.