މޯލްޑިވްސް އިސްލާމިކް ބޭންކް (އެމްއައިބީ) އިން ރާއްޖޭގެ ބޭންކިން ނިޒާމަށް ގެންނަމުންދާ އީޖާދީ ބަދަލުތަކުގެ ތެރެއިން، ކޭޝް ކާޑުގެ ބަދަލުގައި ބޭނުންކުރެވޭ 'ފައިސާވެއާ' ޓެގް މިއަދު ތައާރަފުކޮށްފިއެވެ. 

ފައިސާގެ މުއާމަލާތްތައް ފަސޭހަކަމާއެކު ކުރުމަށް ގެނައި ބަދަލާއެކު، ފައިސާ ވެއާ ޓެގް ބޭނުންކުރެވޭނެ ފަސޭހަ ގޮތްތަކެއް އެމްއައިބީން ވަނީ ހަމަޖައްސައިފިއެވެ. އެގޮތުން ފައިސާވެއާ ޓެގް، ފޯނުގައި ހަރުކޮށްގެން ނުވަތަ ކީޗެއިންގައި ހަރުކޮށްގެންވެސް ފައިސާގެ މުއާމަލާތްތައް ކުރެވޭނެއެވެ. ކޭޝް ކާޑެކޭ އެއްގޮތަށް ޕީއޯއެސް މެޝިންތަކުގައިވެސް ފައިސާވެއާ ޓެގް ބޭނުންކުރެވޭނެއެވެ. 

އެމްއައިބީން ބުނީ ފައިސާވެއާ ޓެގުން ޑޮމެސްޓިކް އަދި އިންޓަނޭޝަނަލް ބޭނުންވެސް ކުރެވޭނެ ކަމަށެވެ. ފައިސާވެއާ ޓެގްގެ މުއްދަތަކީ އެކްޓިވޭޓް ކުރާ ތާރީހުން ފެށިގެން ތިން އަހަރެވެ. ފައިސާވެއާ ޓެގްގެ ޕިން ނަންބަރު ފައިސާނެޓް އަދި ފައިސާމޯބައިލް މެދުވެރިކޮށް ބަދަލުކުރެވޭ ގޮތަށް ވަނީ ހަމަޖައްސައިފައެވެ. އެމްއައިބީން ބުނީ 750 ރުފިޔާއިން ފެށިގެން ދަށުގެ ވިޔަފާރިތަކުގައި ފައިސާވެއާ ޓެގް، ޕިން ނަންބަރާ ނުލައި ބޭނުންކުރެވޭނެ ކަމަށެވެ. 

އެމްއައިބީގެ 'އެޕްލައިނައު' ޕޯޓަލްއިން އެޕްލައިކޮށްގެންނާއި، މާލެ، ހުޅުމާލެ، އަދި އެމްއައިބީގެ ބްރާންޗްތަކަށް ޒިޔާރަތްކޮށްގެން ފައިސާވެއާ ޓެގް ލިބޭނެ އިންތިޒާމު ހަމަޖެހޭނެކަމަށް އެމްއައިބީން ބުނެފައިވެއެވެ. 

ފައިސާވެއާ ޓެގް ވުޖޫދު ކުރިއިރު، އެމްއައިބީން ދާދިފަހުން ވަނީ ފައިސާވެއާ އަނގޮޓި ވެސް ތައާރަފްކޮށްފައެވެ. ފަސޭހައިން ފައިސާގެ މުއާމަލާތް ކުރެވޭ ފައިސާވެއާ އަނގޮޓިއަށް ކަސްޓަމަރުންގެ ބޮޑު ތަރުހީބެއް ލިބުނެވެ. އެމްއައިބީން މިހާރު އަންނަނީ ފައިސާވެއާ އަނގޮޓީގެ އާ ޑިޒައިންތަކެއް ނެރުމަށް ތައްޔާރުވަމުންނެވެ.

ފައިސާގެ މުއާމަލާތްތަކަށް ފަސޭހަ ބަދަލުތައް އެމްއައިބީން ގެންނައިރު، އެ ބޭންކުގެ ގިނަ ހިދުމަތްތައް މިހާރު ދެނީ އޮންލައިކޮށެވެ.