ސަރުކާރުން އުތުރުގައި ހިންގާ އެންމެ ބިޔަ ތަރައްގީގެ މަޝްރޫއު ކަމަށް މޯލްޑިވްސް އިކޮނޮމިކް ގޭޓްވޭ ޕްރޮޖެކްޓުގެ ދަށުން އިހަވަންދިއްޕޮޅުގައި ތަރައްގީކުރާ ބަނދަރާއި އެ ބަނދަރާ ގުޅިފައިވާ އެހެނިހެން ހިދުމަތްތައް ގާއިމުކުރުމަށް ސިންގަޕޫރުގެ ކުންފުންޏަކާ އެކު 100 މިލިއަން ޑޮލަރުގެ ފްރޭމްވޯކު އެއްބަސްވުމެއްގައި މިއަދު ސޮއިކޮށްފި އެވެ. 

ގ. ސީރާޒީގެ "ކަމަނަ" މާލަމުގައި ބޭއްވި ރަސްމިއްޔާތުގައި މި އެއްބަސްވުން ގާއިމްކޮށްފައި ވަނީ ސަރުކާރުގެ ބޮޑު ފަސް ކުނި ގުޅިގެން އުފައްވާފައިވާ މޯލްޑިވްސް އިންޑަސްޓްރިއަލް ފްރީޒޯން ކުންފުންޏާއި ސިންގަޕޫރުގެ ކެޕިޓަލް އޭޝިއާ އިންވެސްޓް ފަންޑްއާ ދެމެދު އެވެ. ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ފްރީ ޒޯން ކުންފުނީގެ މެނޭޖިން ޑިރެކްޓަރު، ޝިމާދު އިބްރާހިމެވެ. ކެޕިޓަލް އޭޝިއާގެ ފަރާތުން ސޮއިކުރެއްވީ އެ ކުންފުނީގެ ޗީފް ކޮމާޝަލް އޮފިސަރު ޓަން ކުން ޗިއާ ޖޯޖެވެ.

މި ރަސްމިއްޔާތުގައި ވާހަކަދައްކަވަމުން، އެސްޓީއޯގެ މެނޭޖިން ޑިރެކްޓަރުގެ މަގާމު ވެސް އަދާކުރައްވާ ޝިމާދު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ތަސައްވުރަކީ ދިވެ ހިރާއްޖޭގެ އިގުތިސާދު ސިންދަފާތުކޮށް ފަތުރުވެރިކަމުގެ މައްޗަށް އިގުތިސާދު ބަރޯސާވެފައި އޮތް އޮތުން ކުޑަކުރުން ކަމަށެވެ. އެގޮތުން މޯލްޑިވްސް އިކޮނޮމިކް ގޭޓްވޭ ކުންފުނިން އުތުރުގައި ބަނދަރެއް ތަރައްގީކުރުމާ ގުޅޭ ގޮތުން ކެޕިޓަލް އިންވެސްޓުމެންޓް ކުންފުންޏާ އެކު ވަރަށް ތަފުސީލު ގޮތެއްގައި މަޝްވަރާކޮށްފަައިވާ ކަމަށް ވިދާޅުވި އެވެ. 

މި ރަސްމިއްޔާތުގައި ކެޕިޓަލް އޭޝިއާގެ ޗީފް ކޮމާޝަލް އޮފިސާ ޓަން ކުން ވިދާޅުވީ މިއީ ރާއްޖޭގެ ތަރައްގީ އިތުރު މަރުހަލާއަކަށް ގެންގޮސް، ބައިނަލްއަގުވާމީ ކަނޑު ދަތުރުފަތުރުގައި ރާއްޖޭގެ ދައުރު އިތުރަށް ފުޅާވާނެ މަޝްރޫއެއް ކަމަށެވެ. އަދި މި މަޝްރޫއުގެ ތެރެއިން ރާއްޖޭގެ އުފެއްދުންތެރިކަން އިތުރުކޮށް ޒަމާނީ، ދެމެހެއްޓެނެވި ވަސީލަތްތައް ގާއިމުކުރެވޭނެ ކަމަށް ވިދާޅުވި އެވެ.

* ވެއާހައުސް ފެސިލިޓީ 

* ކްރޫޒް ލައިން

ރިއަލް އެސްޓޭޓް ޑިވެލޮޕްމަންޓް 

* ފައިނޭންސިން ސާވިސް

* އޮންޝޯ ބަންކަރިން

* އިންޓަނޭޝަނަލް ޑޮކްޔާޑް

މިއަދު ސޮއިކުރި ފްރޭމްވޯކް އެއްބަސްވުމުގެ ދަށުން ހަ މަސް ދުވަހު ތެރޭ ޑީޓެއިލް އެއްބަސްވުމުގައި ސޮއިކުރަން ޖެހެ އެވެ. އެއްބަސްވުމުގައިވާ ގޮތުން ފުރަތަމަ ފިޔަވަހީގައި ވެސް ކެޕިޓަލް އޭޝިއާ އިން 100 މިލިއަން ޑޮލަރު އިންވެސްޓްކުރަން ޖެހެ އެވެ. 

މޯލްޑިވްސް އިންޑަސްޓްރިއަލް ފްރީޒޯން ކުންފުންޏަކީ ސަރުކާރުގެ މައި ވިޔަފާރި ކުންފުނި، އެސްޓީއޯ، އެމްޕީއެލް، އެމްއޭސީއެލް، އެމްޓީސީސީ އަދި އެޗްޑީސީ ގުޅިގެން އުފައްދާފައިވާ ކޮންސޯޓިއަމެކެވެ.

މި ޕްރޮޖެކްޓުގެ ދަށުން އެންމެ ފުރަތަމަ ކުރާނެ މަސައްކަތަކީ ހޯރަފުށީގެ ބޮޑު ފަޅުން ބޮޑު ބައެއް ހިއްކުމެވެ.