ENGLISH
04 އޭޕްރީލު 2025
ބާކީ ތިބި ރަހީނުން މިނިވަންކުރަން ޙަމާސް އާއި އިޒްރޭލުން އެއްބަސްވެއްޖެ
19 ފެބްރުއަރީ 2025
|
އެންމެ މަޤްބޫލު
ފަލަސްތީނުގެ ޣައްޒާގައި ޙަމަލާތައް ހުއްޓައިލުމަށް ވެފައިވާ އެއްބަސްވުމުގެ ދަށުން، ބާކީ ތިބި ރަހީނުން މިނިވަންކުރަން ޙަމާސް ޖަމާޢަތުން އެއްބަސްވެއްޖެއެވެ.
މިދިޔަ މަހުގެ 19 ވަނަ ދުވަހު ޢަމަލުކުރަން ފެށި ޙަމަލާތައް ހުއްޓައިލުމުގެ އެއްބަސްވުމުގެ ފުރަތަމަ ފިޔަވަހީގެ ދަށުން، ޙަމާސްއިން ރަހީނުކޮށްފައިވާ 33 މީހަކާއި، އިޒްރޭލުގެ ޖަލުތަކުގައި ބަންދުކޮށްފައިތިބި 1،900 އެއްހާ ފަލަސްތީނުގެ ރައްޔިތުން މިނިވަންކުރަން ވަނީ ހަމަޖެހިފައެވެ.
ފުރަތަމަ ފިޔަވަހީގެ ދަށުން، މިހާތަނަށް 19 ރަހީނަކާއި 1،100 ޤައިދީން ވަނީ މިނިވަންކޮށްފައެވެ.
ބާކީތިބި 14 ރަހީނުންގެ ތެރެއިން، ދުނިޔޭގައި މި ވަގުތު ތިބީ ހަ މީހުން ކަމަށް ޙަމާސް އިން ވަނީ ބުނެފައެވެ. އެއާ އެކު، އަންނަ ހޮނިހިރު ދުވަހު، އެ ހަ ރަހީނުންނާއި މަރުވި އަށް ރަހީނުންގެ ހަށިގަނޑު އިޒްރޭލްއާ ޙަވާލުކުރަން ނިންމާފައިވާ ކަމަށް ޙަމާސް ޖަމާޢަތުގެ އިސް އޮފިޝަލަކު ވިދާޅުވިއެވެ.
ޙަމާސްގެ ބެލުމުގެ ދަށުގައި ތިބި ރަހީނުން މަރުވީ، އިޒްރޭލުން ޣައްޒާއަށް ދިން ޙަމަލާތަކެއްގައި ކަމަށް އެ ޖަމާޢަތުން މީގެ ކުރިން ބުނެފައިވެއެވެ.
ތިން ފިޔަވައްސަކަށް ބަހާލާފައިވާ މި އެއްބަސްވުމުގެ ފުރަތަމަ މަރުޙަލާގައި، ޙަމާސްއިން ރަހީނުކޮށްފައިވާ މީހުންނާއި އިޒްރޭލުގެ ޖަލުތަކުގައި ތިބި ފަލަސްތީނުގެ ރައްޔިތުން މިނިވަންކުރުމުގެ އިތުރުން، ޣައްޒާގައި އާންމުން ދިރިއުޅޭ ސަރަޙައްދުތަކުން އިޒްރޭލު ސިފައިން ފޭބުން ހިމެނެއެވެ.
ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.
މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލް ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.
މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.
ޣައްޒާ އަލުން ބިނާ ކުރުމަށް ސަޢުދީ އަރަބިއްޔާ އިސްވެ، މިޞްރާއި، ޖޯޑަން އަދި ޤަތަރުގެ އިސްވެރިންނާ އެކު އަންނަ ހުކުރު ދުވަހު މަޝްވަރާތައް ފެށުމަށް ވަނީ ހަމަޖެހިފައެވެ.
މީގެއިތުރުން، އަންނަ މާޗް މަހުގެ ހަތަރު ވަނަ ދުވަހު، މިޞްރުން ވަނީ ޣައްޒާ އާ ގުޅޭގޮތުން އަރަބި ލީގުގެ ބައްދަލުވުމެއް ތާވަލުކޮށްފައެވެ.
މި ބައްދަލުވުންތަކުގައި ޣައްޒާއިން ފަލަސްތީނުގެ ރައްޔިތުން ބައިތިއްބައިގެން، އެތަން އަލުން ބިނާކުރުމުގެ މަޝްވަރާތައް ކުރެވޭނެއެވެ.