އެމެރިކާގެ ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލުމަށް އީރާނުން ރާވާފައިވާ ކަމަށް ބުނާ މައްސަލައެއްގައި އަފްޣާނިސްތާނުގެ ރައްޔިތަކާ މެދު އެމެރިކާގެ ސަރުކާރުން ދައުވާކޮށްފިއެވެ.

މި ދައުވާ ކޮށްފައިވަނީ ޓްރަމްޕް ރައީސްކަމަށް އިންތިޚާބުވުމުގެ ކުރިންނެވެ.

އެމެރިކާގެ ޑިޕާޓްމަންޓް އޮފް ޖަސްޓިސްއިން އިއްޔެ ހާމަކުރި މައުލޫމާތުގައިވާ ގޮތުން، 51 އަހަރުގެ ފަރްހާދު ޝާކިރީއާ މެދު ދައުވާކޮށްފައިވަނީ ޓްރަމްޕް އަވަހާރަކޮށްލުމުގެ "ޕްލޭނެއް" އެކުލަވާލުމަށް އޭނާއާ ހަވާލުކުރި ކަމަށް ބުނެއެވެ. އޭނާ މިހާރު ހުރީ އީރާނުގައި ކަމަށް ބެލެވެއެވެ.

މެންހެޓަން ކޯޓަށް ހުށަހެޅި ޖިނާއީ މައްސަލައެއްގައި، އީރާނުގެ ރިވޮލިއުޝަނަރީ ގާޑުގެ އޮފިޝަލަކު 2022 ވަނަ އަހަރުގެ ސެޕްޓެމްބަރު މަހު ޝާކިރީއަށް އަންގާފައިވަނީ ޓްރަމްޕް އަވަހާރަކޮށްލުމުގެ ޕްލޭނެއް އެކުލަވާލުމަށް ކަމަށް ޕްރޮސިކިއުޓަރުން ބުނެފައިވެއެވެ.

އެމެރިކާގެ އެޓަރނީ ޖެނެރަލް މެރިކް ގާލަންޑް ވިދާޅުވީ، އީރާނުގެ ވެރިކަމުގެ އެސެޓަކާ މެދު ޑިޕާޓްމަންޓް އޮފް ޖަސްޓިސްއިން ދައުވާކޮށްފައިވާނެ ކަމަށެވެ އެ ފަރާތާ ހަވާލުކުރެވިފައިވަނީ ކުށްވެރިންގެ ނެޓްވޯކެއް މެދުވެރިކޮށް އީރާނުން އަމާޒުކުރާ ފަރާތްތައް، އޭގެ ތެރޭގައި ރައީސްކަމަށް އިންތިޚާބުވެފައިވާ ޑޮނަލްޑް ޓްރަމްޕްވެސް ހިމެނޭ ގޮތަށް، އަވަހާރަކޮށްލުމުގެ ރޭވުންތައް ކުރިއަށް ގެންދިއުމަށެވެ.

މީގެ އިތުރުން، އީރާނާ ދެކޮޅަށް ފާޅުގައި ފާޑުކިޔާ އެމެރިކާގެ ނޫސްވެރިއަކު އަވަހާރަކޮށްލުމަށް ރެކްރޫޓްކުރެވުނު ކަމަށް ބުނެވޭ އިތުރު ދެ މީހަކާ މެދުވެސް ޑިޕާޓްމަންޓް އޮފް ޖަސްޓިސްއިން ދައުވާކޮށްފައިވެއެވެ. މި ދެ މީހުންނަކީ ބްރުކްލިންގެ 49 އަހަރުގެ ކާލައިލް ރިވެރާ އާއި ސްޓެޓަން އައިލެންޑްގެ 36 އަހަރުގެ ޖޮނަތަން ލޯޑްހޯލްޓްއެވެ. މި ދެ މީހުން ބުރާސްފަތި ދުވަހު ނިއު ޔޯކުގެ ސަދަން ޑިސްޓްރިކްޓް ކޯޓަށް ހާޒިރުކުރެވި، ޝަރީއަތް ނިމެންދެން ބަންދުގައި ބޭތިއްބުމަށް ނިންމާފައިވެއެވެ.

ޓްރަމްޕް އަވަހާރަކޮށްލުމުގެ ޕްލޭނެއް ހަތް ދުވަހުގެ ތެރޭގައި އެކުލަވާލުމަށް ޝާކިރީގެ ކިބައިން އެދިފައިވާ ކަމަށް ދައުވާގައި ބުނެފައިވެއެވެ. ނަމަވެސް، ޕްރޮސެކިއުޓަރުން ބުނާ ގޮތުގައި ޝާކިރީ ތަޙުޤީޤު ފަރާތްތަކަށް ބުނެފައިވަނީ އެ މުއްދަތުގެ ތެރޭގައި ޓްރަމްޕް އަވަހާރަކޮށްލުމުގެ ޕްލޭނެއް ހުށަހެޅުމުގެ ގަސްތެއް ނެތް ކަމަށެވެ. އެހެންކަމުން، އީރާނުގެ ރިވޮލިއުޝަނަރީ ގާޑުގެ އޮފިޝަލުން މި ޕްލޭން ފަސްކޮށްފައިވާ ކަމަށް ބުނެފައިވެއެވެ.

ޕްރޮސިކިއުޓަރުން ބުނާ ގޮތުގައި ޝާކިރީ ވަނީ އީރާނުގެ ސަރުކާރުން އޭނާއަށް އަންގާފައި ވަނީ އިންތިޚާބަށްފަހު ޓްރަމްޕް އަވަހާރަކޮށްލަން މަސައްކަތްކުރަން ފަސޭހަވާނެ ކަމަށެވެ. އެއީ ޓްރަމްޕް އިންތިޚާބުގައި ބަލިވާނެ ކަމަށް އެ ފަރާތްތަކުން ޤަބޫލުކުރާތީއެވެ.

ޕްރޮސިކިއުޓަރުން ޝާކިރީ ސިފަކޮށްފައިވަނީ ކުޑައިރު އެމެރިކާއަށް އައި އަފްޣާނިސްތާނުގެ ރައްޔިތެއްގެ ގޮތުގައެވެ. އޭނާ ވަނީ ވައްކަމުގެ ކުށަކަށް 14 އަހަރު ޖަލުގައި ހޭދަކުރުމަށްފަހު 2008 ވަނަ އަހަރު އެމެރިކާއިން ޑިޕޯޓްކޮށްފައެވެ.

ޕްރޮސެކިއުޓަރުން ބުނާ ގޮތުގައި ޝާކިރީ ވަނީ ޖަލުގައި ހުރެގެން "ކުށްވެރިންގެ ނެޓްވޯކެއް" ބޭނުންކޮށްގެން، އީރާނުގެ ސަރުކާރުން އަމާޒުކުރާ ފަރާތްތަކުގެ މައްޗަށް ސަރވެއިލަންސް ހިންގާފައެވެ.

ޕްރޮސިކިއުޓަރުން ތުހުމަތުކުރާ ގޮތުގައި ޝާކިރީ ވަނީ ރިވެރާ އާއި ލޯޑްހޯލްޓަށް 100,000 ޑޮލަރު ދޭން ވައުދުވެފައެވެ.