ބޯހިޔާވަހިކަމަށް ގެދޮރު އިމާރާތްކުރުމަށް ފަސް ޕަސެންޓަށް ވުރެ ބޮޑު ނޫން އިންޓަރެސްޓު ރޭޓުގައި ދޭ ލޯނަށް "ހިޔާވެހި ޕޯޓަލް" މެދުވެރިކޮށް މިއަދުން ފެށިގެން ހުށަހެޅޭނެ ކަމަށް ހައުސިން މިނިސްޓްރީން މިއަދު ބުނެފި އެވެ.

މި ލޯން ސްކީމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެއް ކަމަށްވާއިރު، މިދިޔަ އަންގާރަ ދުވަހު އެމަނިކުފާނު ވަނީ މި ސްކީމް އިފްތިތާޙުކޮށްދެއްވައިފައެވެ. ހައުސިން މިނިސްޓްރީން ބުނެފައިވާ ގޮތުގައި ހިޔާވެހި ޕޯޓަލް މެދުވެރިކޮށް، ހިޔާވެހި ފައިނޭންސިން ޕްރޮގްރާމްގައި މިއަދުން ފެށިގެން ބައިވެރިވެވޭނެއެވެ. އަދި މި ޕޯޓަލްއަށް އީފާސް މެދުވެރިކޮށް ލޮގްއިން ވެވޭނެއެވެ.

މި ސްކީމްގެ ބައިވެރިންގެ ގޮތުގައި ހިމެނެނީ ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)، ބޭންކް އޮފް މޯލްޑިވްސް (ބީއެމްއެލް) އަދި މޯލްޑިވްސް އިސްލާމިކް ބޭންކް (އެމްއައިބީ) އެވެ.

މި ސްކީމްގެ ދަށުން ބޯހިޔާވަހިކަމަށް ގެދޮރު އިމާރާތްކުރަން ލޯނު ދޫކުރާނީ ތިން ގިންތިއަކުންނެވެ. އެއީ އަތޮޅުތެރެއަށް، އާބަން ސެންޓަރުތަކަށް އަދި ފުރަމާލެއަށެވެ. އަތޮޅުތެރެއަށް އެއް މިލިއަން ރުފިޔާއާ ހަމައަށް، އާބަން ސެންޓަރުތަކަށް ތިން މިލިއަން ރުފިޔާއާ ހަމައަށް، އަދި މާލެ ސަރަހައްދުގައި ގެ އަޅަން ހަ މިލިއަން ރުފިޔާއާ ހަމައަށް ލޯނު ދޫކުރެވޭނެއެވެ.

މި ސްކީމްގެ ބޭނުމަކީ ގެދޮރު ހަދަން ބޭނުންވެ ހަދަން ނުފެށިފައިވާ ފަރާތްތަކަށް ލޯނު ދޫކުރުމާއި، ހަދަން ފަށައި ނުނިމި ހުރި އިމާރާތްތައް ނިންމަން އެހީވުމާއި، މާލޭގައި ހިމެނޭ ކުދި ބިންތައް އެއްކޮށްލައިގެން ގެ ހަދަން މަގުފަހިކޮށްދިނުމެވެ.

މި ސްކީމަށް ލޯނު ދޫކުރުމުގެ ގޮތުން އަންނަ އަހަރުގެ ބަޖެޓުގައި އެއް ބިލިއަން ރުފިޔާ ވަނީ ޚާއްސަކޮށްފައެވެ. މި ސްކީމްގެ ސަބަބުން ގިނަ ރައްޔިތުންނަށް އަތްފޯރާފަށުގައި ގެދޮރުވެރިކަން ހޯދުމުގެ ފުރުސަތު ލިބިގެންދާނެ ކަމަށް ސަރުކާރުން އުންމީދުކުރެއެވެ.