ENGLISH

04 އޭޕްރީލު 2025

Advertisement

އެއްބަސްވުމުގެ ސުންގަޑި ހަމަވިއިރު އިޒްރޭލު ސިފައިން ލުބްނާނުން ނުފޭބި، 5 ސަރަޙައްދެއްގައި ތިބޭނެ

18 ފެބްރުއަރީ 2025

|

ހަސަން އާމިރު

އިޒްރޭލާއި، ލުބްނާނުގައި ޙަރަކާތްތެރިވާ ހަނގުރާމަވެރި ޖަމާޢަތް، ޙިޒްބުﷲ އާ ދެމެދު ޙަމަލާތައް ހުއްޓައިލުމުގެ އެއްބަސްވުމުގެ ދަށުން ލުބްނާނުގެ ދެކުނުގައި ތިބި އިޒްރޭލު ސިފައިން ފައިބަން ދީފައިވާ ސުންގަޑި ހަމަވިއިރު، ފަސް ސަރަޙައްދަކުން އިޒްރޭލު ސިފައިން ނުފައިބާނެ ކަމަށް ބުނެފިއެވެ.

އިޒްރޭލާއި ޙިޒްބުالله އާ ދެމެދު އަހަރަކަށް ވުރެ ގިނަ ދުވަސް ވަންދެން ކުރަމުންދިޔަ ހަނގުރާމަ، އެމެރިކާ އާއި ފްރާންސް އިސްވެ އޮވެ، ހަނގުރާމަ ހުއްޓާލުމުގެ އެއްބަސްވުމެއް ޤާއިމުކުރީ މިދިޔަ ނޮވެމްބަރު މަހުގެ ތެރޭގައެވެ.

އެ އެއްބަސްވުމުގެ ދަށުން ލުބްނާނުގެ ލީތާނީ ކޯރުގެ ދެކުނުގެ ސަރަޙައްދުތަކުން ޙިޒްބުاللهގެ ހަނގުރާމަވެރިން ފައިބައި ހަތިޔާރުތައް އެހެން ސަރަޙައްދަކަށް ގެންދަން ޖެހެއެވެ. އޭގެ އިތުރުން އިޒްރޭލު ސިފައިން ވެސް ލުބްނާނުގެ ދެކުނުގެ ސަރަޙައްދުތަކުން ފައިބަން ޖެހެއެވެ. އެ ސަރަޙައްދުގައި ދެން ޙަރަކާތްތެރި ވާނީ ލުބްނާނުގެ އަސްކަރިއްޔާއިން ކަމަށް އެެއްބަސްވުމުގައި ބުނެފައިވެއެވެ.

އެކަމަށް ދީފައިވާ 60 ދުވަހުގެ މުއްދަތު ހަމަވުމުން، އެ ސުންގަޑި ވަނީ މިއަދާ ހަމައަށް އިތުރުކޮށްފައެވެ.

ލުބްނާނުގެ އޮފިޝަލުން ވިދާޅުވީ، ދެކުނުގެ ބޯޑަރު ކައިރީގެ ބައެއް އަވަށްތަކުން އިޒްރޭލު ސިފައިން އިއްޔެ ފައިބަން ފަށާފައިވީ ނަމަވެސް، މައި ސަރަޙައްދުތަކުގައި އަދިވެސް ތިބި ކަމަށެވެ.

ސުންގަޑި ހަމަވުމުގެ ކުރިން، އިޒްރޭލުގެ އަސްކަރިއްޔާއިން ނެރުނު ބަޔާނެއްގައި ބުނީ، އިޒްރޭލުގެ ރައްޔިތުންގެ ސަލާމަތާއި ރައްކާތެރިކަމަށްޓަކައި، ލުބްނާނުގެ މައި ފަސް ސަރަޙައްދެއް ދިފާޢު ކުރުމަށްޓަކައި އިޒްރޭލުން ސިފައިން ދެމިތިބޭނެ ކަމަށެވެ.

ލުބްނާނުން ވަނީ އިޒްރޭލު ސިފައިން ފޭބުމުގެ ސުންގަޑި ދެން އިތުރުނުކުރާނެ ކަމަށް ބުނެފައެވެ. އަދި މި އެއްބަސްވުން ޤާއިމުކުރުމުގައި އިސްކޮށް އުޅުނު ޤައުމުތަކުން އިޒްރޭލު ސިފައިން ބާލަން، އިޒްރޭލު ސަރުކާރަށް ޕްރެޝަރު ކުރުމަށް ވެސް ލުބްނާނުން ދަނީ ގޮވާލަމުންނެވެ.

ޙިޒްބުﷲ އިން މީގެކުރިން ބުނެފައިވާ ގޮތުގައި، އިޒްރޭލު ސިފައިން ނުފައިބައިފިނަމަ، އެއްބަސްވުމާ ޚިލާފުވި ކަމަށް ބަލައި، ބައިނަލްއަޤުވާމީ ގޮތުން އެޅެން ހުރި ފިޔަވަޅުތައް އިޒްރޭލާ ދެކޮޅަށް އަޅާނެ އެވެ.

ކިޔުންތެރިންގެ ހިޔާލު