ރަޝިޔާ އާއި ޔޫކްރޭނުން ކުރަމުންދާ ހަނގުރާމަ ނިންމުމުގެ މަޝްވަރާތައް، އެމެރިކާއިން އިސްވެ ރަޝިޔާ އާ އެކު ސައުދީ އަރަބިއްޔާގައި ފަށަން ތައްޔާރުވެފައިވާއިރު، އެ މަޝްވަރާތަކުގައި ޔޫކްރޭނުގެ ބައިވެރިވުމެއް ނެތް ކަން ހާމަވެއްޖެއެވެ.

އެމެރިކާ އާއި ރަޝިޔާގެ ޚާރިޖީ އިސް ބޭފުޅުން ސައުދީގައި މިއަދު ބައްދަލުކުރައްވަން ވަނީ ހަމަޖެހިފައެވެ. ނަމަވެސް، މަޝްވަރާތަކުގެ ފުރަތަމަ މަރުޙަލާގައި ހަނގުރާމަ ނިންމުމަށް މާބޮޑު ކުރިއެރުމެއް ލިބޭނެ ކަމަކަށް ދެ ފަރާތުން ވެސް ޤަބޫލެއް ނުކުރެއެވެ.

ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ވިދާޅުވީ ސައުދީގެ ވެރިރަށް ރިޔާދުގައި އޮންނަ މަޝްވަރާތަކަށް ޔޫކްރޭނަށް ދަޢުވަތު ލިބިފައިނުވާ ކަމަށެވެ.

ޔޫކްރޭނުގެ ބައިވެރިވުމެއް ނެތި، ހަނގުރާމަ ނިންމުމަށް އެމެރިކާއިން ކުއްލި ގޮތަކަށް ރަޝިޔާއާ މަޝްވަރާކުރަން ނިންމުމުގެ ކަންބޮޑުވުން ވިލާތުގެ އިއްތިހާދުން ވެސް ވަނީ ފާޅުކޮށްފައެވެ.

ޔޫކްރޭންއާ ދެކޮޅަށް ކުރަމުންދާ ހަނގުރާމަ ހުއްޓާލައި، ސުލްޙަ ޤާއިމުކުރުމުގެ މަޝްވަރާއަށް ރަޝިޔާގެ ރައީސް ވްލޮޑޮމިޔަރ ޕޫޓިންއާ ސައުދީ އަރަބިއްޔާގައި ބައްދަލުކުރައްވަން ހަމަޖެހިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ފަހުން، ޔޫކްރޭނުގެ ހިތްހަމަނުޖެހުމާއި ނުތަނަވަސްކަން ވަނީ ބޮޑުވެފައެވެ.

ރިޔާދުގައި މިއަދު ފަށައި މަޝްވަރާތަކުގައި، ޓްރަމްޕް އާއި ޕޫޓިންގެ ބައްދަލުވުން ހަމަޖެއްސުމާ ގުޅޭގޮތުން މަޝްވަރާ ކުރާނެ ކަމަށް ބެލެވެއެވެ.

ޒެލެންސްކީ ޔޫކްރޭނުގެ މީޑިޔާތަކަށް ވިދާޅުވި ގޮތުގައި، ރިޔާދުގައި މިއަދު ފަށައި މަޝްވަރާތަކާބެހޭ އެއްވެސް މައުލޫމާތެއް ލިބިފައެއް ނުވެއެވެ. އަދި ޔޫކްރޭނުގެ ބައިވެރިވުމެއް ނޫނީ ބަހެއް ނެތި، އެ މަޝްވަރާތަކުގައި އެއްބަސްވެވޭ ކަމެއް ޔޫކްރޭނުން ބަލައިނުގަންނަވާ ކަމަށް ވެސް ޒެލެންސްކީ ވަނީ ތަކުރާރުކޮށް ވިދާޅުވެފައެވެ.

ދެވަނަ ދައުރަކަށް އެމެރިކާގެ ރައީސްކަމަށް ވަޑައިގެންނެވި ޓްރަމްޕް ވަނީ ރަޝިޔާ-ޔޫކްރޭނުގެ ހަނގުރާމަ ނިންމުމަކަށް ގެންނަން އަމާޒު ހިއްޕަވައިފައެވެ.

މިގޮތުން، ވެރިކަމަށް ވަޑައިގަންނަވަތާ 24 ގަޑިއިރުގެ ތެރޭގައި އެ ހަނގުރާމަ ނިމުމަކަށް ގެންނަވާނެ ކަމަށް، ރިޔާސީ ކެމްޕޭނުގެ ތެރޭގައި ޓްރަމްޕް ވަނީ ވިދާޅުވެފައެވެ.