މަސްވެރިންގެ ޤައުމީ ދަފްތަރުގައި މިހާތަނަށް 80 އިންސައްތަ އުޅަނދު ރަޖިސްޓްރީކޮށްފައިވާކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް މިއަދު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެއްގެ ދަށުން އެކުލަވާލެވުނު މި ދަފްތަރުގެ މައިގަނޑު މަޤްޞަދަކީ މަސްވެރިކަމަކީ ދައުލަތުން ބަލައިގަންނަ އާމްދަނީ ލިބޭ މަސައްކަތެއްގެ ގޮތުގައި ކަނޑައެޅުމެވެ. މި ދަފްތަރު އިފްތިތާޙުކޮށްފައި ވަނީ މިއަހަރުގެ ފެބްރުއަރީ މަހުގެ 16 ވަނަ ދުވަހުއެވެ.

ވަޒީރު ޝިޔާމް ވިދާޅުވި ގޮތުގައި މި ދަފްތަރު އެކުލަވާލުމަށްޓަކައި އެ ވުޒާރާގެ 30 އަށްވުރެ ގިނަ މުވައްޒަފުން ރާއްޖޭގެ 15 އަތޮޅަކަށް ދަތުރުކޮށްފައިވެއެވެ. އަދި މިހާތަނަށް ކުރެވުނު މަސައްކަތުން 350 އުޅަނދު ދަފްތަރުކުރެވިފައިވާ ކަމަށް އެމަނިކުފާނު ހާމަކުރެއްވިއެވެ.

މި ދަފްތަރުގެ އެންމެ މުހިންމު ބޭނުމަކީ މަސްވެރިންނަށް މާލީ ވަސީލަތްތަކުގެ ފައިދާ ލިބިގަތުމަށް ހުރި ހުރަސްތައް ނައްތާލައި، މަސްވެރިކަމަކީ ވެސް ރާއްޖޭގައި ރަސްމީކޮށް ބަލައިގަންނަ ވަޒީފާއަކަށް ހެދުމެވެ. މިކަމުގެ ސަބަބުން މަސްވެރިންނަށް އިތުރު ފަސޭހަތަކެއް ލިބިގެންދާނެކަމަށް ވަޒީރު ފާހަގަކުރެއްވިއެވެ.

ވަޒީރު ވަނީ ރާއްޖޭގެ ހުރިހާ އޮޑިވެރިންނަށް އެ މީހުންގެ އޮޑިދޯނިފަހަރު ދަފްތަރުކުރުމަށް ގޮވާލައްވައިފައެވެ. މީގެއިތުރުން، މަސްވެރިކަމާބެހޭ ވުޒާރާއިން ވަނީ ފާނައިގެ މަސްވެރިކަން ފަދަ ފަރުމަސްވެރިކަމުގެ ބާވަތްތަކާއި ރެކްރިއޭޝަނަލް ފިޝިން އަދި ސްޕޯޓްސް ފިޝިން ފަދަ ހަރަކާތްތަކުގެ މަޢުލޫމާތު ވެސް ފުރިހަމަ ގޮތެއްގައި ނެގޭނެ އިންތިޒާމު ހަމަޖައްސަވާނެ ކަމަށް ވިދާޅުވެފައެވެ.