މާލެ ސަރަޙައްދުގެ ސިއްޙީ ޚިދުމަތްތައް ފުޅާކުރުމަށް ސަރުކާރުން ކުރައްވާ މަސައްކަތުގެ ދަށުން، މިއަހަރު ނިމުމުގެ ކުރިން މާލެ ސަރަޙައްދުގެ ސަރުކާރު ހޮސްޕިޓަލްތަކުގެ އޮޕަރޭޝަން ތިއޭޓަރުތަކުގެ އަދަދު 12 އަށް އިތުރުކުރެވޭނެ ކަމަށް ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވެއްޖެއެވެ.

ޕީއެސްއެމް ގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން އިބްރާހީމް ޙަލީމް ވިދާޅުވީ، މިހާރު އައިޖީއެމްއެޗް އާއި ދަރުމަވަންތަ ހޮސްޕިޓަލްގައި ޖުމްލަ ހަތަރު އޮޕަރޭޝަން ތިއޭޓަރު ހުރި ނަމަވެސް، އައިޖީއެމްއެޗްގެ ބެޑް ކެޕޭސިޓީ އިތުރުވުމާއެކު އެ އަދަދު އށަކަށް އަރާނެ ކަމަށެވެ. އަދި މިއަހަރު ނިމުމުގެ ކުރިން މާލެ ސަރަޙައްދުގައި ހުރި ސަރުކާރު ހޮސްޕިޓަލްތަކުގެ އޮޕަރޭޝަން ތިއޭޓަރުގެ އަދަދު 12 އަށް އިތުރުކުރެވޭނެ ކަމަށްވެސް އޭނާ ވިދާޅުވިއެވެ.

މީގެ އިތުރުން، ހުޅުމާލޭގައި ބޮޑު އާބާދީއެއް އޮތް ނަމަވެސް މިހާތަނަށް ހުޅުމާލެ ހޮސްޕިޓަލްގައި އައިސީޔޫއެއް ނެތްކަން އަބްދުއްރައްޒާގު ޙަލީމް ފާހަގަކުރެއްވިއެވެ. ނަމަވެސް، ހުޅުމާލެ ހޮސްޕިޓަލް ތަރައްޤީ ކުރުމުގެ މަސައްކަތުގެ ތެރެއިން ހަތަރު އޮޕަރޭޝަން ތިއޭޓަރާއި 14 އެނދުގެ އެންއައިސީޔޫއަކާއި 10 އެނދުގެ އައިސީޔޫއެއް ތަރައްޤީކުރުމުގެ މަސައްކަތް ހިނގަމުންދާ ކަމަށް އޭނާ ވިދާޅުވިއެވެ.

އައިޖީއެމްއެޗްގެ ތަފާސް ހިސާބުތަކުން ދައްކާ ގޮތުގައި، އިމަޖެންސީ އާއި ޖެނެރަލް ޕްރެކްޓިސް ނުވަތަ އާންމު ބަލިތަކަށް ޑޮކްޓަރަށް ދެއްކުމަށް 150,000 އަށްވުރެ ގިނަ މީހުން ޒިޔާރަތްކޮށްފައިވެއެވެ. އަދި އޯޕީޑީ ކޮންސަލްޓޭޝަންލްޓޭޝަންގެ ޚިދުމަތް ހޯދުމަށް 240,000 މީހުން ޒިޔާރަތްކޮށްފައިވާއިރު، ހުޅުމާލެ ހޮސްޕިޓަލަށް 238,000 އަށްވުރެ ގިނަ މީހުން ޒިޔާރަތްކޮށްފައިވެއެވެ.

ސަރުކާރު ހޮސްޕިޓަލުތަކުގެ ކިއު ދިގުވެ، ޑޮކްޓަރަށް ދެއްކުމަށް ހޭދަވާ ވަގުތު ކުޑަކުރުމަށްޓަކައި މާލޭގެ ހަތަރު ސަރަޙައްދެއްގައި ސަރުކާރުގެ ހޮސްޕިޓަލްތަކުގެ ޖެނެރަލް ޕްރެކްޓިސް (ޖީޕީ) ނުވަތަ އާންމު ބަލިތަކަށް ފަރުވާ ދިނުމަށް ކްލިނިކްތަކެއް ޤާއިމްކުރުމުގެ މަސައްކަތް ވެސް ވަނީ ފަށައިފައެވެ. މި މަސައްކަތްތަކުގެ ސަބަބުން އައިޖީއެމްއެޗަށް ބާރުބޮޑުވާ މައްސަލައަށް ހައްލެއް ލިބޭނެކަމަށް އިބްރާހީމް އަބްދުއްރައްޒާގު ޙަލީމް އުންމީދު ކުރައްވައެވެ.

މި ހުރިހާ މަސައްކަތްތަކަކީ އައިޖީއެމްއެޗްގެ ޚިދުމަތްތައް ލުއިފަސޭހަކޮށް، އަވަސްކޮށް ފޯރުކޮށްދިނުމަށް ގެންނަމުންދާ މުހިއްމު ބަދަލުތަކުގެ ބައެކެވެ. މި ބަދަލުތަކުގެ ސަބަބުން މާލެ ސަރަޙައްދުގެ ރައްޔިތުންނަށް ލިބޭ ސިއްޙީ ޚިދުމަތުގެ ފެންވަރު މަތިވެ، ޚިދުމަތް ލިބުމުގެ ފަސޭހަކަން އިތުރުވާނެއެވެ.