ދުނިޔޭގެ އެންމެ މަޝްހޫރު ފާސްޓް ފުޑް ޗެއިން ކަމުގައިވާ މެކްޑޮނަލްޑްސްގެ ވިޔަފާރި ދަށްވެއްޖެ އެވެ.

މެކްޑޮނަލްޑްސްގެ ސީއީއޯ ކްރިސް ކެމްޕްޒިންސްކީ ވިދާޅުވި ގޮތުގައި، އަގުތައް މައްޗަށް ދިއުމާ ގުޅިގެން ކަސްޓަމަރުން ވަނީ އަގު ހެޔޮ އޮޕްޝަންތަކަށް ބަދަލުވެފައެވެ. އަދި ބޭރުން ކާ މިންވަރު މަދުކޮށްފައެވެ. މިގޮތުން، މިއަހަރުގެ އޭޕްރިލް އިން ޖޫން އަށް މެކްޑޮނަލްޑްސްގެ ދުނިޔޭގެ ވިޔަފާރި ވަނީ އެއް އިންސައްތަ ދަށަށް ގޮސްފައެވެ.

ކުންފުނީގެ ވިޔަފާރި ދަށަށް ދިއުމުގެ އެންމެ ބޮޑު ސަބަބަކީ ޗައިނާގައި ކަސްޓަމަރުންގެ އިތުބާރު ދަށްވުމާއި، މެދުއިރުމަތީގައި އިސްރާއީލަށް ތާއީދުކުރާކަމަށް ބެލެވިގެން މެކްޑޮނަލްޑްސް ބޮއިކޮޓްކުރުމެވެ. މިކަމުގެ ސަބަބުން ބައިނަލްއަޤްވާމީ ލައިސެންސް ދޫކޮށްފައިވާ މާކެޓްތަކުގައި ވިޔަފާރި ވަނީ 1.3 އިންސައްތަ ދަށަށް ގޮސްފައެވެ.

ކެމްޕްޒިންސްކީ ވިދާޅުވި ގޮތުގައި، ކުރިން އަގުބޮޑު ރެސްޓޯރަންޓްތަކުން މެކްޑޮނަލްޑްސްއަށް ބަދަލުވި ކަސްޓަމަރުންގެ ފައިދާއަށްވުރެ، މިހާރު އާމްދަނީ ދަށް ފަރާތްތައް މެކްޑޮނަލްޑްސްއިން ގެއްލެމުންދާ މިންވަރު ބޮޑެވެ. 

މި ހާލަތު ރަނގަޅުކުރުމަށްޓަކައި، މެކްޑޮނަލްޑްސްއިން ވަނީ 5 ޑޮލަރުގެ ޚާއްޞަ މެނޫއެއް ތަޢާރަފުކޮށްފައެވެ.

"އަޅުގަނޑުމެންގެ ހުރިހާ މުހިންމު މާކެޓްތަކެއްގައި ވެސް ވިޔަފާރި އަލުން ކުރިއަރުވަން މަސައްކަތްކުރާނަން. މިއީ އެއްރޭ އެއް ދުވާލަކުން ވާނެ ކަމެއް ނޫން. އެހެނަސް މިކަން ކުރާނަން،" ކެމްޕްޒިންސްކީ ވިދާޅުވިއެވެ.